பித்தனின் கிறுக்கல்கள்

பித்தனின் கிறுக்கல்கள் – 47

2012-01-20T20:06:00.001-06:00

துக்ளக் 42வது ஆண்டு விழா

‘சோ’ வின் துக்ளக் ஆண்டு விழாவைப் பற்றி ப்ரஸ்தாபிக்க மட்டும் இந்தப் பதிவில்லை. அவர் நடுநிலையாளரா இல்லையா என்பதுவும் எமது பலகோடி கவலைகளில் ஒன்றில்லை. அவர் ஜெயலலிதாவை அடுத்த ப்ரதமராக முன்னிருத்தியதுவும் பெரியதில்லை. இந்தப் பதிவின் பின்னூட்டத்தில் குறிப்பிட்ட படி இவர் தான் ப்ரதமராக வேண்டும் என்ற வரைமுறையில்லாததால் யார் வேண்டுமானாலும் இந்தியாவின் ப்ரதமராகலாம். இத்தாலியிலிருந்து வந்தவருடைய பின்புலம் எத்துணை சந்தேகத்துக்குரியதாக இருந்தாலும் சரி அவர் ப்ரதமராக முயற்சிக்கலாம், அதை கேட்ட உடன் இந்தியாவின் ஸ்டாக் மார்கெட் தரைமட்டத்தை அடைந்த உடன், சீ சீ இந்தப் பழம் புளிக்கும் என்ற நரிக்கதையைப் போல, உடனே ஒரு தலையாட்டி பொம்மையை ப்ரதமராக்கி விட்டு பின்னனியிலிருந்து ஆட்சி நடத்தலாம், கோடியாக கொள்ளையடிக்கலாம். அது எப்படி எல்லோருக்கும் ஏற்புடையதாகிறது என்பது எமக்கு விளங்காத ஒன்று.

எமது ஆச்சர்யம், ‘சோ’ நடுநிலையாளர் இல்லை என்பது பலருடைய கருத்தாக இருக்கிறது, அவர் சமீபகாலமாக ஜெயலலிதாவை அதிகம் ஆதரிக்கிறார் அதனால் அவர் அங்கு பொட்டி வாங்கிவிட்டார் என்றும் சிலருடைய கருத்துக்கள் இருக்கிறது. ஆட்சியில் 5 வருடங்கள் இல்லாத அவரை ஆதரிக்க பொட்டி வாங்கினால், ஆட்சியில் இருந்த தாத்தாவை ஆதரித்தவர்கள் வாங்கியது என்ன என்று எமது கேள்வி அமைந்தால், அது கருணாநிதி துவேஷம் என்ற பகுத்தறிவு எமக்கு இன்னமும் வந்தபாடில்லை. இப்படி ஒரு நடுநிலைவாதி என்ற கபட வேடதாரியின் வருடாந்தர கூட்டத்திற்கு போஸ்டர் பார்த்துவிட்டு ஆயிரக்கணக்கில் வருகிற கூட்டம் எதற்கு என்று தெரியவில்லை. ஆள் எம்.ஜி.ஆர் கணக்காக அழகாக இருந்தாலாவது பரவாயில்லை, அதுவும் இல்லை, தாத்தா போல சுத்தத் தமிழில் பேசினாலாவது பரவாயில்லை, அதுவும் இல்லை, பாதி நேரம் தமிழ், மீதி நேரம் சமஸ்க்ருதம், ஆங்கிலம் என்று கலந்து கட்டி அடிக்கிறார். கேள்வி கேட்கும் வாசகர்களை ஒழுங்காகப் பேசவிடுவதும் இல்லை, எல்லோருக்கும் மூக்குடைப்பு, எதற்கும் சரியான பதிலில்லை, எல்லோருக்கும் அறிவுரை என்று இருக்கும் இவருக்கும், இவருடைய இந்த பத்திரிகையின் ஆண்டு விழாவிற்கும் எப்படி இவ்வளவு பேர் தவறாமல் வருகிறார்கள். ஓ ஒருவேளை இந்த வருடம் யார் யார் திட்டு வாங்கப் போகிறார்களோ என்ற எதிர்பார்ப்போடு வருவார்களோ? இப்படி ஒரு விஷயத்தை எந்த பத்திரிகையும் செய்ய முயற்சித்ததாகக் கூடத் தெரியவில்லை. ஆனால் இவர் 42 வருடங்களாக தொடர்ந்து இதைச் செய்து வருகிறார். இப்படிப் பட்ட விழாக்கள் சிலதை சென்னையில் இருந்த போது நேரில் போய்ப் பார்த்து அனுபவிக்கும் ஆசை இருந்தும் சமயம் கைக்கூடாததால் பார்க்க முடியாமல் போய்விட்டது. எது எப்படியோ, ஹாட்ஸ் ஹாஃப் டு சோ.

உத்திரப் ப்ரதேச தேர்தல்

தமிழகத் தேர்தல்கள் நமது தமிழ் சங்கத் தேர்தல் போல சுலபமான ஒன்று என்று சொல்ல வைக்கக்கூடிய தேர்தல் உத்திரப் ப்ரதேசத் தேர்தல். மாயாவதிக்கும், முலயாம் சிங் மற்றும் காங்கிரஸுக்கும் இடையே நடக்கும் மும்முனைத் தேர்தல். பாஜக வுக்கு அதிகம் வாய்ப்பில்லாததால் இந்த தேர்தலை நான்கு முனைப் போட்டி என்று சொல்ல முடியவில்லை. மாயாவதி சிலையை துணி போட்டு மறை, அவர்கள் சின்னமான யானை சிலைகளையும் துணி போட்டு மறை என்று மறை கழன்றமாதிரி தேர்தல் கமிஷன் கட்டளையிட அந்தக் கூத்தும் நடந்துள்ளது. பணம் தண்ணீர் மாதிரி என்பதைத் தாண்டி காற்று மாதிரி சுழற்றி சுழற்றி அடித்து இந்தத் தேர்தல் நடைபெற இருக்கிறது. யார் ஜெயித்தாலும், வழக்கம் போல் தோற்கப் போவது பொதுஜனம் தான்.

சமீபத்தில் பார்த்த படங்கள்:

நண்பன்

த்ரீ இடியட்ஸ் ஹிந்திப் படத்தின் ஈ அடிச்சான் காப்பியாக இருந்தாலும், வசனங்கள் வரிக்கு வரி தெளிவாகப் புரிகிறது, அதனால் நன்கு ரசிக்க முடிகிறது. விஜய்க்கு பன்ச் டைலாக் இல்லை, அடிதடி இல்லை, சவால்விடும் காட்சிகள் இல்லை, ஸ்டைல் இல்லை. ஆனால் படத்தில் கலக்கியிருக்கிறார். ஜீவா வழக்கம் போல அறுமையாக நடித்திருக்கிறார், ஸ்ரீகாந்த் தனக்கு நடிக்கத் தெரியும் என்பதை முதல் முறையாக தெளிவாக செய்திருக்கிறார். இலியானா நடிக்க அதிகம் சந்தர்ப்பம் இல்லாத போதும் வந்து போயிருக்கிறார். ஸ்ரேயாவிற்குப் பிறகு நன்கு நடனமாடத் தெரிந்த ஒரு நடிகை தான் என்பதை நிருபித்திருக்கிறார். சத்யன் இதுவரை சத்யராஜ் மாதிரியே நடித்துக் கொண்டிருந்தவர் முதல் முறையாக பின்னி பெடலெடுத்திருக்கிறார். சத்யராஜ், இதுவரை பார்த்திராத ஒரு பரிமாணத்தில் வருகிறார், ஓவர் ஆக்டிங் போல இருந்தாலும், கலக்கியிருக்கிறார். கண்டிப்பாக பார்க்கக்கூடிய நல்ல படம்.

ஒஸ்தி

தபாங் இந்திப் படத்தின் அட்டக் காப்பி படம். இதில் வரும் ஒரே ஒரு நெருடல், இந்திப் படத்தில் சல்மான் கான் வழக்கம் போல நடிக்கத் தெரியாமல் சொதப்பியிருந்தும் படம் சூப்பர் டூப்பர் ஹிட், அதே படம் தமிழில் நடிக்கத் தெரிந்த சிம்பு நடிப்பதால் சூப்பர் டூப்பர் ஃப்ளாப் ஆகியிருக்கிறது. லாஜிக் பார்க்காமல், மசாலா படம் பார்க்க ஆசையிருந்தால், கண்டிப்பாகப் பார்க்கலாம். பொழுது போகும்.

வேலாயுதம்

மசாலா, மசாலா, மசாலா இதை தாண்டி எதுவும் இந்தப் படத்தில் இல்லை. ஆனால், அதை திருநெல்வேலி அல்வாவைப் போல சாப்பிட்டு கலக்கியிருக்கிறார் விஜய். மசாலா படங்களில் நடிப்பது இவருக்கு கை வந்த கலை. முடிவு கொஞ்சம் ஜவ்வு மிட்டாய் போல இழுக்கப் பட்டாலும், ஒரு முறை பார்க்கலாம்.

வித்தகன்

ஆங்கிலத்தில் வித் எ கன் ஆம், பார்த்திபன் ஒரு விதமான நடிகர், நடிப்பு அநாயசமாக வரக்கூடிய சிலரில் இவரும் ஒருவர். இயல்பான நகைச்சுவை உணர்வு உள்ளவர், சீரியஸ் ரோல்களிலும் கலக்கக் கூடியவர். இவரே எழுதி இயக்கி நடித்து இருக்கும் இந்தப் படத்தில் முதல் குறை, எடிடிங், அந்த மகானுபாவன் யார் என்று தெரிந்தால் போய் போட்டுத் தள்ள வேண்டும், படத்தை கொத்தி குதறி யாருக்கும் புரியாத மாதிரி செய்திருக்கிறார். மிக மிக நல்ல படங்கள் வரிசையில் சேர்ந்திருக்கக்கூடிய படத்தை கெடுத்த முதல் ஆள் எடிட்டர். அடுத்து திரைக்கதை அமைத்த பார்த்திபன், முடிக்கத் தெரியாமல் முடித்த இயக்குனர் பார்த்திபன். படம் முடியும் போது, சூப்பராக சுடச் சுட வேர்கடலை சாப்பிட ஆரம்பித்த நமக்கு பாக்கெட் முடியும் போது சொத்தைக் கடலை வாயில் மாட்டிய ஒரு உணர்வு வருவதை தவிர்க்க முடியவில்லை.

Ides of March

ஜார்ஜ் க்ளூனி எழுதி, இயக்கி நடித்திருக்கும் படம். ஃப்ராக்சர் என்ற படத்தில் ஆண்டனி ஹாஃப்கின்ஸுடன் நடித்த ரையன் காஸ்லிங், தான் ஒரு திறமையான நடிகர் என்று மீண்டும் நிருபித்திருக்கும் படம். கதை அமெரிக்காவில் அதிபர் தேர்தலுக்கு போட்டியிட முனையும் ஜார்ஜ் க்ளூனியும் அவருக்கு அதற்கு பக்க பலமாக இருக்கும் ரையனுக்கும் நடக்கும் சில சம்பவங்களைக் கொண்ட படம். குழந்தைகளுடன் பார்க்ககூடிய படமில்லை. ஆனால் கண்டிப்பாக ஒரு முறை பார்க்கக்கூடிய படம் இது.

சிம்ஹா (தெலுங்கு)

பாலகிருஷ்ணா (என்.டி.ராமாராவின் மகன்) இரு வேடங்களில் நடித்து வந்த படம். குப்பை என்று சர்வசாதாரணமாக சொல்லி விடலாம், பாவம் 3 கதா நாயகிகள், 300 அடியாட்கள், ரெண்டு தலைமுறைக் கதைகள், 7-8 பாடல்கள், எண்ணிலடங்கா சண்டை காட்சிகள், கார்கள் எரிப்பு என்று ப்ரமாண்டமாக எடுக்கப் பட்ட படத்தை எப்படி குப்பை என்று சொல்வது என்று தெரியவில்லை.

டான் (தெலுங்கு)

நாகர்ஜுனா நடித்து, ராகவா லாரன்ஸ் இயக்கி நடித்துள்ள மஹா திராபைப் படம். பார்க்காவிட்டால் தப்பித்தீர்கள்.

பித்தனின் கிறுக்கல்கள் தொடரும் ......

piththanp@gmail.com

பித்தனின் கிறுக்கல்கள் 46

2011-12-03T22:49:00.001-06:00

கனிமொழி ஜாமீன்.

குற்றம் சாட்டப் பட்டது சாட்டப் பட்டதுதான் அதில் எந்த மாற்றமும் இல்லை. நிரபராதி என்று தீர்ப்பு வரவில்லை, ஆறு மாதம் கோர்ட் கோர்ட்டாக ஏறி இறங்கி போன மாதம் சோனியாவின் காலில் விழுந்து, குட்டிக்கரணம் போட்டு, அழுது, ஒப்பாரி வைத்து ஒரு சப்பை ஜாமீன் வாங்கி விட்டு அதுவும் ‘சோ’ சொன்னது போல் பல குழப்படி செயல்களுக்குப் பிறகு கிடைத்திருக்கிறது. இதற்கு ஒரு பெரிய பில்டப் கிழவனாரால் கொடுக்கப் பட்டு, இதற்கு தியாகம் என்ற பெயர் சூட்டப் பட்டு அள்ளக் கைகள் பேனர் ஒட்டி, கூப்பாடு போட்டு இவைகளுக்கு நடுவில் சென்னை வந்திருக்கிறார்.

கலைஞர் இந்த சந்தர்ப்பத்தில் வழக்கம் போல மீண்டும் “ராஜா என்னோடு பேசி வேண்டிக்கொண்டால் அவருக்கும் ஜாமீன் விஷயத்தில் உதவ முடியும்” என்று உளறியிருக்கிறார். இணைக் குற்றவாளியான தனது முறைதவறிப் பிறந்த (illegitimate) மகளுக்கே ஜாமீன் எடுக்க 6 மாதம் முந்தைய பாராவில் சொன்னது போல தகிடுதனங்கள் செய்து போனவாரம் ஜாமீன் மனு விசாரிக்கும் போது எந்த நம்பிக்கையும் இல்லாமல் இருந்த இந்த கொள்ளை கும்பல், இப்போது நிபந்தனை ஜாமீன் கிடைத்தவுடன் இவர் முதல் குற்றவாளியும் முக்கியக் குற்றவாளியுமான ராஜாவுக்கு ஜாமீன் வாங்கித் தருவாராம். இந்தாளுக்கு இருப்பது வாயா வண்ணான் ஜாடியா என்பது தெரியவில்லை. ராஜா கில்லாடி, தான் நிரபராதி என்று தீர்ப்பான பிறகுதான் தான் வெளியே வருவேன் என்று ஒரு டைலாக் ஒரு முறை, கனிமொழிக்கு ஜாமீன் கிடைத்தால் தனது ஜாமீன் பற்றி முடிவெடுப்பேன் என்று ஒரு டைலாக் ஒரு முறை. ஒரு வளைதளத்தில் சமீபத்தில் படித்தது. ராஜா திஹார் ஜெயிலில் இருந்தால் அவருக்கு நல்லது(உயிரோடு இருக்கலாம்), வெளியில் இருந்தால் கருணாநிதிக்கு நல்லது (போட்டுத் தள்ளிவிடலாம்).

இந்த ஜாமீன் கிடைத்ததில் திமுக அடிப்பொடியில் துவங்கி தலை வரை சொல்வது கனிமொழி நிரபராதியாம், இவர் குற்றம் செய்யாதவராம், இவங்களை சொல்லி குற்றமில்லை இவங்களை இன்னமும் பேச விட்டு, எது நடந்தாலும் தனக்கும் அதற்கும் எந்த சம்பந்தமும் இல்லை என்று இருக்கும் திருதராஷ்ட்டிர மன்மோகன் சிங்கும், தனது வானளாவிய அதிகாரத்தை பயன்படுத்தும் துரியோதனி சோனியா போன்றோர் ஆட்சியில் இருக்கும் வரை என்ன பேசி, என்ன கிறுக்கி, என்ன நடக்கப் போகிறது.

இவர்களுக்கு மாற்று என மக்கள் நினைத்தாலும், தான் நினைக்காத பாஜக தலைவர்கள் ஒரு புறம், ஊழல் ஊழல் என்று அதை ஒரு ஜனலோக்பால் சட்டத்தின் மூல சரி செய்ய முடியும் என காமெடி செய்யும் அன்னா ஹசாரே மற்றும் இவரது குழப்படி கும்பல் ஒரு புறம். வெறுமே புலம்பி, கிறுக்கியபடி இருக்கும் புலம் பெயர்ந்த எம்மைப் போன்ற அடிமைகள் ஒரு புறம், ராமன் ஆண்டால் என்ன ராவணன் ஆண்டால் என்ன என்றிருக்கும், இந்தியப் பொதுஜனம் ஒரு புறம் என்று இருக்கும் இந்நிலையில் எதைச் சொல்லி என்ன புண்ணியம் என்று தெரியவில்லை.

அன்னா ஹசாரேவின் அடுத்த உண்ணாவிரதம்

நாடாளுமன்ற குளிர் காலத் தொடரில் அன்னா ஹசாரே அவரும் அவரது குழுவினரும் சொன்ன லோக்பால் மசோதாவை அவர்கள் சொன்ன படி மத்திய அரசு நிறைவேற்றாததால், அதை அவர்கள் சொன்ன படி அரசு நிறைவேற்றும் வரை மீண்டும் உண்ணாவிரதம் இருக்கப் போகிறாராம். நல்லது, போன முறை செய்தது போல இந்த முறையும் அங்கே வருகின்ற எல்லோருக்கும் அன்னதானம் நடை பெறுமா என்று தெரியவில்லை. அது நடக்கும் வரை இவருடன் கிரண் பேடி இவருடைய குழுவில் இருந்தால் இங்கும் ஒரு டான்ஸ் போடுவாரா என்று தெரியவில்லை. அடுத்த முறை ஆடும் போது, வேலாயுதம் அல்லது ரா ஒன் படத்தின் பாட்டு ஒன்றுக்கு ஆடச் சொல்லலாம். அதிலும் வேலாயுதம் படத்தில் வரும் ‘ரத்தத்தின் ரத்தமே, என் இனிய உடன்பிறப்பே” பாட்டுக் ஆடச்சொல்லலாம். அப்போது இளைய தளபதியையும் வரச் சொன்னால் போச்சு. என்ன, இப்படி கிறுக்க நல்லாயிருக்கலாம், பார்க்கத்தான் கண்றாவியாக இருக்கும்.

போன முறை ப்ரணாப் முகர்ஜி சூப்பராக அல்வா கொடுத்து விட்டார் இந்த முறை அதே மாதிரி செய்தால் என்ன செய்வது என்று இப்போதே அன்னாவின் கும்பல் கவலைப் பட ஆரம்பித்து விட்டது. அதன் வெளிப்பாடு, “நான் இறந்தால் அதற்கு இந்த அரசு தான் காரணம், நான் இறந்தால் மக்களுக்காக போராடிய ஒரு பைத்தியக்காரன் இறந்தான் என்று உலகம் பேசும். லோக்பால் மசோதாவில் நாங்கள் சொன்னதை நிறைவேற்றாததற்கு ராகுல் காந்தியே காரணம்” என்று சகட்டு மேனிக்கு உளறியிருக்கிறார். இவர் உளறுவது ஒன்றும் புதிதில்லை. இது நம்மை போன்ற தமிழக மக்களுக்கு ஒன்றும் பெரிய விஷயமில்லை. “இருப்பது ஒரு உயிர் அது போவது ஒரு முறை, அதுவும் தமிழுக்காக போவது பெருமை”, “உடல் மண்ணுக்கு உயிர் தமிழுக்கு”, “அடைந்தால் தனிதமிழ்நாடு இல்லையேல் சுடுகாடு”, “ரூபாய்க்கு மூனு படி அரிசி இலவசம், இல்லையேல் முச்சந்தியில் வைத்து சவுக்கால் அடியுங்கள்”, “ரூபாய்க்கு மூனு படி லட்சியம், ஒரு படி நிச்சயம்”, “எரிப்போம் எரிப்போம், இந்திய அரசியல் சட்டத்தை எரிப்போம்”, “அரசியல் சட்டைத்தையா எரித்தோம், வெறும் காகிதத்தை அல்லவா எரித்தோம்” என்ற வசனங்களை தினம் தினம் கேட்டு வளர்ந்தவர்கள் நாம். இதையெல்லாம் மிஞ்சும் வசனம் இதுவரை நாம் பார்த்ததில்லை. கொஞ்சம் பக்கத்தில் வரும் வசனம், இந்திராகாந்தியின் “கரீபி ஹடாவ்” அதாவது “ஏழ்மையை நீக்குவோம்”, அதை சொல்லி விட்டு அதனுடைய நிஜ அர்த்தம், அவருடைய மகன் சஞ்சய் காந்தி டெல்லியில் இருந்த பெரிய கீழ்த்தட்டு மக்களின் குடியிருப்பை புல்டோசர் விட்டு இடித்துத் தள்ளி விட்டு அங்கு இருந்த 2 லட்சத்து 50 ஆயிரம் ஏழை மக்களை டெல்லியை விட்டு வெளியேற்றிய பிறகு மக்களுக்கு புரிந்தது.

இந்த காந்தியவாதியின் கூட இருக்கும் மக்களின் நிஜம் மக்களுக்கும் ஊடகங்களுக்கும் கொஞ்சம் புரிய ஆரம்பித்திருக்கிறது. கேஜ்ரிவால் இவர்கள் குழுவிற்கு வந்த நன்கொடையை தனது கட்டுப் பாட்டில் இருக்கும் ஒரு தொண்டு நிறுவனத்தில் போட்டிருக்கிறார். கிரண் பேடி பல தன்னார்வ நிறுவனங்களிடம் அதிகமாக பயணத் தொகை வசூலித்து, அவர்களையும், அரசாங்கத்தையும் முட்டாளாக்கியிருக்கிறார். இவர்களைத் தூக்கி சாப்பிடும், அன்னாவோ, இவரது கிராமத்தில் குடிப்பவர்களை மரத்தில் கட்டி வைத்து இவரே பிரம்பால் அடிப்பாராம். சமீபத்தில் சரத் பவாரை ஒரு இளைஞர் அடித்து விட்டாரே என்று அன்னாவிடம் கேட்டதற்கு “ஒரே ஒரு அடிதான் அடித்தானா?” என்று கேட்டு தனது மனநிலையை மீண்டும் ஒரு முறை வெளிப்படுத்தியிருக்கிறார். இவரை யாரும் எதுவும் சொல்லக் கூடாது, சொன்னால் பல தரப்பட்ட மக்களுக்கும் கோபம் வரும். இவருக்கோ எரிச்சலே வரும். சமீபத்தில் பாஜகவின் முக்கிய தலைவர்(அந்தக் கட்சியில் நிஜத் தலைவர் யார் என்று அவர்களுக்கே தெரியாததால்) அத்வானி ஊழலுக்கு எதிராக ரத யாத்திரை போனதை இவர் தன்னைப் பார்த்து அத்வானி செய்யும் ஒரு அரசியல் ஸ்டண்ட் என்று விமர்சித்திருக்கிறார். இது தமிழினக் காவலர் பட்டம் கருணாநிதிக்கு என்று தமிழ் பேசும் பல தமிழக ஜால்ராக்கள் சேர்ந்து கொடுத்ததைப் போல இருக்கிறது.

தமிழ்ப் படங்கள்

7ம் அறிவு

முதல் 10 நிமிடங்கள் பார்க்கலாம், கடைசி 20 நிமிடங்களில் ஒரு 10 நிமிடம் பார்த்து விட்டு சூர்யா பேட்டி கொடுக்க ஆரம்பித்ததும் ஓடி விடலாம். பாடல்களில் கார்த்திக் பாடியிருக்கும் “முன் அந்திச் சாரல்” பாடல் மட்டும் சற்று நேரம் விட்டும் முணு முணுக்க வைக்கிறது.

கமலின் மகள் ஸ்ருதி தெலுங்கில் 2-3 படங்கள் வந்த போன பிறகு, (நடித்த பிறகு என்று பொய் சொல்லக் கூடாது), தமிழில் அறிமுகம் என்று கார்ட் போடப் பட்டு வந்திருக்கும் படம். குரல் ஒரு மைனஸ், நடனம் பெரிய மைனஸ், முக பாவங்கள் மைனஸ் மைனஸ் மைனஸ், குரல் ஏற்ற இறக்கம் (மாடுலேஷன்), 4 மைனஸ். இவர் பேசாமல், பாடாமல், மாடலிங் செய்ய போகலாம். ஜவுளிக் கடையில் இருக்கும் ஒரு பொம்மை அழகாக இருந்தால் போதும் அது பாட, ஆட, பேச, பழக வேண்டும் என்று யாரும் விரும்பப் போவதில்லை.

இனி கதை:

பல்லவ மன்னனின் மகன் போதி தர்மன் சீனாவுக்கு பவுத்த மதம் பரப்பச் சென்று அங்கிருப்பவர்களுக்கு மருத்துவம், குங்ஃபூ கற்றுத் தர அவர்கள் இவர் அவர்களோடு இருந்தால் நல்லது என்று அவருக்கு விஷம் கொடுத்து கொலை செய்து இவரது உடல் அவர்கள் மண்ணில் இருந்தால் நல்லது என்று புதைத்து விடுகிறார்கள்.

இதைப் பற்றி ஆராய்ச்சி செய்து இவரது மரபணுவை இவரது வாரிசுகளில் யார் இவரது மரபணுவுக்கு அருகில் வருகிறாரோ அவருக்கு அதைச் செலுத்த அந்த போதி தர்மனின் அனைத்து கலைகளையும் கைக் கொண்டு மீண்டும் ஒரு போதி தர்மன் உருவாக முடியும் என்று ஆராய்ச்சி மாணவி ஸ்ருதி ஹாசன் மூலம் சொல்லி ஜல்லியடித்திருக்கிறார்கள்.

இதை 10-15 வருடங்களுக்கு முன்பு சுஜாதா ஒரு மர்மத் தொடரில் கையாண்டிருந்தார். ஒரு மனிதன் தன் வாழ்நாளில் கற்கும் பல விஷயங்கள் அவனுடைய காலத்திற்குப் பிறகு என்ன ஆகும் என்று சிந்திருப்பார். அதை ஒரு கம்ப்யூட்டர் ஹார்ட் டிரைவ்வில் பாடல்களையும், செய்திகளையும் பதிப்பது போல பதிந்து அதை மற்ற ஒருவருக்குள் செலுத்தி இறந்த மனிதனின் திறமைகளை மீண்டும் பயன் படுத்த முடியுமா என்று சிலர் ஆய்வது போல எழுதியிருப்பார். என்ன அந்த மாதிரி வேறு ஒருவரின் திறமைகளை ஏற்றுக் கொள்பவர்கள் முதல் ஆளின் மரபணுவோடு ஒத்திருக்க வேண்டும், மேலும் அவர்களுக்கு இடக்கை கொஞ்சம் குட்டையாகி விடும் அபாயமும் உண்டு. நானும் சூர்யா போதி தர்மனாக ஆன பிறகு அவருடைய கை குட்டியாக இருக்கிறதா என்று பார்த்தேன், 6 பேக்கிற்காக வலு ஏற்றி ஏற்றி, நன்கு கரளை கரளையாக இருந்ததே தவிர குட்டையாக இருந்த மாதிரி தெரியவில்லை.

இதற்கிடையே, சீனா, போதி தர்மன் அவர்களோடிருந்த காலத்தில் குணப்படுத்திய கொடிய நோயை இந்தியாவில் பரப்பி அவர்கள் கேட்கும் அனைத்தையும் இந்தியா செய்ய வைக்கும் எண்ணத்தில் ஒரு சீன உளவாளியை அனுப்பி அதற்கு பல நூறு கோடி ரூபாய்களை செலவழிப்பதாக காட்டி காமெடிக்கு காமெடியை சேர்த்திருக்கிறார்கள். படத்தில் காமெடி இல்லாததால், இந்தக் காமெடி உதவும் என்று நினைத்திருக்கலாம்.

இப்படி பல பைத்தியக்கார செயல்களைச் செய்வதை விட, ஸ்விஸ் பாங்கில் ஒரு அக்கவுண்டில் ஒரு சில நூறு கோடிகளைப் போட்டால் போச்சு, சத்தமே இல்லாமல் எதை வேண்டுமானாலும் சாதித்துக் கொள்ள முடியும் என்பது அந்த சீனக்காரர்களுக்கு தெரியாததால் ஊழல் செய்யத் தெரியாமல் மாட்டிக் கொண்ட சுக்ராம் போல கடைசி காட்சியில் சூர்யாவிடம் பேயடி வாங்கி அந்த சீனக் காரன் இறக்க சூர்யா, ஊழலுக்கு எங்கள் ஆட்சியில் என்றும் அனுமதியில்லை என்று சமீபத்தில் சோனியா உளறியது போல என்ன பேசுகிறோம் என்று தெரியாமல் இயக்குனர் சொன்னது போல உளறி படத்தை முடித்திருக்கிறார்கள்.

பிதாமகன் படத்தில் சூர்யா தனது டிரெண்டாக ஆரம்பித்தது பேசிக் கொண்டே இருப்பது. இது, கொஞ்சம் கொஞ்சமாக, பேரரழகன், ஆறு, வேல், சமீபத்தில் சிங்கம் வரை கடைபிடித்து, இதில் கொஞ்சம் சுமாராக பேசாமல் வந்தார், அதுவும் கொஞ்ச நேரம் கூட தாங்கவில்லை, ஸ்ருதி ஹாசன் அதைப் பிடித்துக் கொண்டு கழுத்தறுக்கிறார்.

பார்க்கவில்லை என்றால் உத்தமம். பார்த்தால், வளை தளத்தில் இந்தப் படத்தைப் பற்றி தேடாதீர்கள். ஒரு பக்கம் இது தமிழிணத்தின் அடையாளம் என்று சிலர் ஜல்லியடிக்க, சிலர், படத்தையும், 5ம் நூற்றாண்டில் என்ன நடந்தது, அதை எப்படி தப்பாக படமெடுத்திருக்கிறார்கள், நம் தமிழை இந்தப் படத்தில் ஒரு இடத்தில் குரங்கோடு ஒப்பிட்டிருக்கிறார்கள் இதை எப்படி அனுமதிக்கல்லாம், இது பார்பனீயத்தை உயர்த்தும் படம், இது திராவிடர்களுக்கு எதிரான ஒன்று, ப்ளாஹ் ப்ளாஹ் என்று மற்றும் சிலர் ஜல்லியடிக்க, எம்மைப் போல சிலர் வடிவேலு சொல்வது போல “பார்க்கலாம், ஆனா, வேணாம், அழுதுடுவீங்க” என்று அட்ண கால் போட்டுக் கொண்டு எல்லாம் தெரிந்தது போல கிறுக்குவோம். பொதுவாக இது ஒரு பொழுது போக்குத் தமிழ்ப் படம், பாட்டு நல்லா இருக்கா, பைட் நல்லா இருக்கா, காமெடி இருக்கா, கதை கொஞ்சமாவது இருக்கா, பன்ச் டைலாக் இருக்கான்னு பாத்துட்டு போயிட்டே இருக்கனும். இந்த அறிவு 7ம் அறிவு படம் பாக்கும் போது இருந்தது இந்தப் பதிவுல ரெவ்யூ எழுதும் போது இல்லை. ஆறாம் அறிவுன்னு நைட் ஷ்யாமளன் படம் எடுத்தார், முருகதாஸ் 7ம் அறிவுன்னு எடுத்திருக்கார். எந்திரன் படத்தில எஸ்.பி.பி பாடர பாட்டுல வைரமுத்துவும் 7ம் அறிவு பத்தி ஒரு இடத்தில சொல்றார். ஆமாம், 7ம் அறிவுன்னா நிஜமாவே என்ன?

Hugo

இந்தப் படம் ஒரு சூப்பர் டூப்பர் படம்ன்னு அதுவும் 3டி ல பார்த்தாத்தான் நல்லா இருக்கும்னு என் ஆத்ம நண்பன் சொன்னதை வெச்சு நானும் போய் பார்த்தேன். கதை நம்மூர் எடை பாக்கர மிஷின்ல வெளியில வர குட்டி டிக்கெட் பின்னாடி எழுதிடலாம். பென் கிங்ஸ்லி 5 டாலர் படத்துக்கு 5 லட்ச டாலருக்கு நடிச்சிருக்கார். யாருக்காவது தூக்க ப்ரச்சனை இருந்தா உத்திரவாதமா படம் ஆரம்பிச்ச பத்தாவது நிமிஷம் தூக்கம் க்யாரண்டி. அந்த ஆத்ம நண்பன் அவ்வளவு தூரம் இந்தப் படத்தை பத்தி ஏத்தி விட என்ன இருக்குன்னு இன்னி வரைக்கும் தெரியலை.

The next 3 Days

இதுவும் சின்ன கதைதான். கொலை செய்ததாக தண்டனை கிடைத்து ஜெயிலில் இருக்கும் தனது மனைவியை காப்பாற்ற முயற்சி செய்து தோற்று, அவரை சிறையிலிருந்து தடாலடியாக தப்பிக்க வைக்க முயற்சிக்கும் ஒரு அருமையான வேடத்தில் ரஸ்ஸல் க்ரோ நடித்து, காட்சிக்கு காட்சி விருவிருப் போடு படத்தை நகர்த்திச் செல்லும் படம். கண்டிப்பாக பார்க்கவேண்டிய அருமையான படம்.

Unknown

மனைவியுடன் ஜெர்மன் செல்லும் ஒரு டாக்டர் ஒரு கார் விபத்தில் 4 நாட்கள் கோமாவில் இருந்து மீண்டு, மறுபடி மனைவியை சந்திக்கும் போது அவர் இவரை அடையாளம் தெரிந்து கொள்ளாமல், இவர் பெயரில் இன்னொருவரை இவர்தான் தனது கணவர், இவர்தான் டாக்டர் என்று இவரிடமே அறிமுகப் படுத்தும் படம். பிறகு தான் யார், ஏன் தன் மனைவி இப்படி நடக்கிறார், அந்த இரண்டாம் கணவன் யார் என்று தேடிக் கண்டுபிடிக்கும் பாத்திரத்தில் கலக்கும் லியாம் நீசன், கடைசியில் உண்மையைக் கண்டு பிடிக்கும் போது திரைக் கதை ‘வாவ்’ சொல்ல வைக்கிறது.

The Hit List

Cuba Gooding Jr. ஒரு வாடகைக் கொலையாளியாக நடித்து இருக்கும் படம். பலப் பல ஓட்டைகள், இரவு 10:30 க்கு கடைசி சீன் முடிந்த பிறகு அடிபட்ட கதா நாயகனின் மனைவியை ஆம்புலன்ஸில் ஏற்றுவது நன்கு வெயிலடிக்கும் நேரத்தில். அதுவரை குண்டடி பட்ட அந்தப் பெண் எப்படி சமாளித்தார், ஏன் ஆம்புலன்ஸ் வர இவ்வளவு நேரம் என்று கேள்வி கேட்காவிட்டால் படம் பார்க்கலாம். ரகசியப் போலீஸ் 115 ல் யார் சுட்டாலும் எம்.ஜி.ஆர் க்கு ஒரு குண்டடிகூட படாது அது போல இவரை யார் தாக்கினாலும் இவருக்கும் ஒன்னும் ஆகாது.

IP Man 1 & 2:

இது தற்செயலாக நான் நெட் ஃப்ளிக்ஸில் பார்த்தப் படங்கள். கதை சீனாவில் இரண்டாம் உலகப் போருக்கு முன் நடப்பதாக ஆரம்பித்து, உலகப் போர் சமயத்தில் ஹாங்காங்கில் முடிவதாகக் காட்டப் பட்டிருக்கும் படம். மார்ஷியல் ஆர்ட்ஸ் கலையான விங் சுன்(Wing Chun) நன்கு தெரிந்த சற்றும் தலைக் கனம் இல்லாத நிஜக் கதாப்பாத்திரமான இப் மான். இவர் ப்ரூஸ் லீயின் ஆசிரியர் என்பது மற்றும் ஒரு சிறப்பு. இந்தக் கதாபாத்திரத்தில் டானி என் (Donnie Yen) என்பவர் இப் மானாக நடித்திருக்கிறார். சண்டைப் படம் அதிலும் சற்று வலுவான கதையம்சம் கொண்ட படம் பார்க்க ஆர்வமிருந்தால் கண்டிப்பாக பார்க்க வேண்டிய படம்.

பித்தனின் கிறுக்கல்கள் தொடரும் ......

piththanp@gmail.com

பித்தனின் மற்றப் பதிவுகளை இங்கே படிக்கலாம்

பித்தனின் கிறுக்கல்கள் - 45

2011-11-05T15:57:00.002-06:00

இந்திய அரசியல்

சிதம்பரத்தின் ஞாபகசக்தி

சமீபத்தில் தனது துறையின் சார்பாக இவர் பங்கேற்ற பத்திரிகையாளர்கள் சந்திப்பில் பல கேள்விகளுக்கு காமெடியாகப் பேசுவதாக உளறித்தள்ளியிருக்கிறார். முதலில், தான் ராஜீனாமா செய்தேனா இல்லையா என்பது இவருக்கு மறந்து விட்டதாம். எத்தனை முறை ராஜீனாமா செய்தீர்கள் என்று கேட்ட போது தனக்கு கணிதம் தெரியாது என்றார். ஒரு முறையாவது ராஜீனாமா செய்தீர்களா என்ற போது, இப்போதுதான் கணிதம் பயிலுவதாகவும் அதனால் தெரியாது என்றும் சொல்லி தனது மேதாவித்தனத்தை வெளிப்படுத்தியிருக்கிறார்.

இது “என்னை உங்களால ஒன்னும் செய்ய முடியாது”ங்கர திமிர், இல்லை “நான் எது பண்ணினாலும் எனக்கு பின்னாடி முதுகெலும்பில்லாத ப்ரதமர் மற்றும் கட்சித் தலைமை இருக்கு, உங்களால முடிஞ்சத பண்ணிக்கங்க”ங்கர தைர்யம். வழக்கம் போல நாம கிறுக்குவோம், இல்லை, கத்துவோம் அதை ஒரு பத்து பதினஞ்சு பேர் படிக்க/கேக்கப் போறாங்க, இதால ஒரு புண்ணாக்கும் ப்ரயோஜனம் இல்லைங்கரது இவர மாதிரி ஆளுங்களுக்கு நல்லா தெரியும் அப்புறம் என்ன.

‘ரமணா’ன்னு ஒரு படம் சில வருஷங்களுக்கு முன்னாடி வந்தது அதுல ஒரு காட்சி, ஹீரோ விஜயகாந்தோட குடும்பம் வீடு இடிஞ்சு விழுந்து செத்துப் போயிடுவாங்க அதை விசாரிக்க ஒரு கலெக்டரை வெச்சு விசாரணை பண்ணும் போது ஒவ்வொரு துறையைச் சேர்ந்தவங்களும் அடுத்த துறையை குற்றம் சொல்வார்கள் அதைப் போல சிஏஜி ராஜாவையும், ராஜா தயாநிதியையும், தயாநிதி அருண் ஷோரியையும், பிறகு ராஜா ப்ரதமரையும், பி. சிதம்பரம் ராஜாவையும், ப்ரணாப் முகர்ஜி பி. சிதம்பரத்தையும் காட்டிக் கொடுக்க பெரிய தமாஷ் அரங்கேறியிருக்கிறது. இதனால் என்ன நடக்கும்-ன்னு யாரும் ரொம்ப எதிர் பார்க்க வேண்டாம். ஒரு மண்ணும் நடக்காது, இந்தக் கொள்ளையில ஈடு பட்ட ஒருத்தருக்கும் தண்டனை கிடைக்காது. சிஏஜி/சிபிஐ ல இருக்கர சில பேருக்கு வேலைல ப்ரச்சனை இருக்கும், பல பேருக்கு ப்ரமோஷன் கிடைக்கும். நாம வழக்கம் போல நெத்திய துடைச்சி வெச்சா ஒரு நாமத்தை நம்பளையே போட்டுக்க சொல்லிட்டு போய்கிட்டே இருப்பாங்க. ஏதாவது கேட்டா தமிழன் மத்திய அமைச்சர இருக்கரதைப் பாத்து பொறாமை படரீங்க. தலித் மத்திய அமைச்சரா இருந்தது உங்களுக்கு பிடிக்கலை. ஆரிய சூழ்ச்சி, பார்பனர்களின் ஏமாத்து வேலைன்னு ஜல்லியடிக்க கூட்டம் கூட்டமா தமிழநாட்டுல மக்கள் இருக்காங்க.

கனிமொழி ஜாமீன் மறுப்பு

நீதிபதி ஓபி ஷைனி கனிமொழி மற்றும் அவரோடு ஜாமீன் மனு செய்திருந்த அனைவருக்கும் ஜாமீன் மறுத்து தீர்ப்பளித்திருக்கிறார். கனிமொழி மற்றும் 4-5 பேருக்கு சி.பி.ஐ ஜாமின் தருவதை எதிர்க்காத போதும் இந்தத் தீர்ப்பை தந்திருக்கிறார். எமக்குத் தெரிந்த சட்டத்தின் படி, அந்த நீதிபதி ஜாமீன் மறுப்பு என்று தெரிவித்திருந்தாலே போதுமானதாக இருந்திருக்கும். இதுவரை இவர்கள் யாரும் குற்றம் செய்தவர்கள் என்று தீர்ப்பு வரவில்லை, குற்றம் செய்திருக்கிறார்கள் என்று கருதப்படுபவர்கள்தான். தீர்ப்பு வரும் முன்பே நீதிபதி இவர்கள் மீது வார்த்தைக் கடினம் காட்டியதைத் தவிர்த்திருக்கக் கூடியது. மேலும், கனிமொழி இப்போது உச்ச நீதிமன்றத்தை அனுகி இந்த நீதிபதி பாரபட்சமாக நடந்து கொள்கிறார் என்று குற்றம்சாட்டியிருக்கிறார்.

இதைத் தவிர, 2ஜி ஊழல் செய்து அதிலிருந்து கையூட்டு பெற்ற போது தான் ஒரு பெண் என்று இவருக்குத் தெரியவில்லை, மாட்டிக் கொள்வோம் என்று பல ஊடகங்களும் சொன்னபோது இவருக்கு தான் ஒரு பெண் என்று தெரியவில்லை, ராஜா மாட்டிக் கொண்டவுடன் அவசர அவசரமாக அதைத் திருப்பித் தந்தது போல ஜோடிக்கும் போதும் அது தெரியவில்லை, மாட்டிக் கொண்டவுடன் தான் ஒரு பெண், ஒரு எம்.பி. ஒரு தாய், ஒரு மனைவி அது இது லொட்டு லொசுக்கு என்று ஆயிரம் சொல்ல முடிகிறது. இதற்கு ஜீ.வி. போன்ற அடிவருடிகளின் ஜால்ரா சப்தம் வேறு காதைத் துளைக்கிறது.

இதுவரை இந்தியாவில் எந்த ஊழல் பேர்வழியும் தண்டிக்கப் பட்டதாகச் சரித்திரம் இல்லை. இந்த தைரியத்தில்தான் ராஜா இதுவரை ஜாமீன் கூட கேட்காமல் திஹாரில் ஜாலியாக இருக்கிறார். எப்படியும் வெளியே வந்து விடுவோம், வந்த பிறகு எப்படியும் தியாகி, செம்மல் என்று ஏதாவது பட்டம் வாங்கிக் கொண்டு மறுபடி தேர்தலில் அடித்துப் பிடித்து ஜெயித்து ஆட்டம் போடப் போகிறோம் இதுக்கு எதுக்கு ஒரு வக்கீலுக்கு பணம் கொடுத்து ஜாமீன் கேட்பானேன் அது மறுக்கப் பட்டு பேப்பரில் செய்தியாக வருவானேன். காசுக்குக் காசு மிச்சம், பட்டமும் பதவியும் பின்னாளில் நிச்சயம். நல்ல கணக்குதான்.

அண்ணா நூலக இடமாற்றம்.

கருணாநிதி கட்டிய அண்ணா நூலகத்தை இடம் மாற்றி அதை ஓர் குழந்தைகள் மருத்துவமனையாக மாற்ற தமிழக அரசு முடிவு செய்திருப்பது பெறும் எதிர்ப்பைக் கண்டிருக்கிறது. முதலில் இந்தக் கட்டிடம் 170 கோடியில் முடிவுறும் என்று தீர்மானிக்கப்பட்டு கடைசியில் இது 230 கோடியில் முடிந்திருக்கிறது. இதைப் பற்றிய ஒரு அலசல் இட்லி-வடையில் விரிவாக வந்திருக்கிறது. இதைப் பற்றி அதிகம் எமக்குத் தெரியவில்லை. இட்லி வடையில் சொல்லியிருப்பது உண்மையாக இருப்பின் ஜெயலலிதா, இதைத் தீவிரமாக விசாரித்து துரைமுருகன் (இவர்தான் முன்பு பொதுப் பணித்தறை அமைச்சராக இருந்தவர்), ஏன் கருணாநிதியையே (இவர்தான் துரைமுருகனைத் தூக்கிவிட்டு அந்தத் துறையையும் சேர்த்துப் பார்த்துக் கொண்டவர்) கூட கை காட்டி அடித்து உள்ளே போட்டிருக்கலாம். ஏன் செய்யவில்லை என்று தெரியவில்லை. இது தவிர இதை இவர் தவிர்த்திருக்கலாம் என்றுதான் நாமும் நினைத்தோம். சமீபத்தில் தமிழ்நாடு எழுத்தாளர்கள் சங்கம் இது அண்ணாவுக்கு செய்யும் அவமதிப்பு என்று சொல்லியிருப்பதாக ஒரு செய்தியைப் படித்தவுடன் எமது கருத்து மாறிவிட்டது. இப்படிப் பட்ட செயல்கள் அண்ணா, கருணாநிதி, பெரியார் என்று யாருக்காவது அவமதிப்பு என்றால் அதைத் தயங்காமல் செய்யவேண்டும். அவர்கள் அடித்த கூத்தினால்தான் தமிழகம் இன்னமும் இப்படி கேடு கெட்டு போய்க் கொண்டிருக்கிறது.

தமிழகத்தில் உள்ளாட்சி மற்றும் திருச்சி இடைத் தேர்தல்

சமீபத்தில் நடந்த தேர்தல்களில் அதிமுக அடித்து நொறுக்கி வெற்றி பெற்றிருக்கிறது. திருச்சி இடைத் தேர்தலில் கே.என். நேரு 15000 வாக்கு வித்தியாசத்தில் தோற்றிருக்கிறார். இவர் காலைக் கட்டிவிட்டு ஓட்டப் பந்தயம் விட்டதால் தோற்றிருக்கிறார் என்று கருணாநிதி வழக்கம் போல் உளறியிருக்கிறார். இடைத்தேர்தலில் நேருவின் பெயரை திமுக அறிவித்த போது அவர் செய்த நில ஆக்ரமிப்பு வழக்குகளுக்காக சிறையிலிருந்தார். சிறையிலிருப்பதால் இவருக்கு அனுதாப ஓட்டு விழும் என்று கணக்கிட்டு அவரை நிறுத்தியது கருணாநிதியின் முட்டாள்த்தனம். இப்போது தோற்ற பிறகு இதற்கு மற்றவரை குறை சொல்வது பச்சை அயோக்கியத்தனம். திருட்டு ரெயிலில் சென்னைக்கு பஞ்சம் பிழைக்க வந்தவரிடம், ரெயிலே ஓடாத தண்டவாளத்தில் தலைவைத்து படுத்து ரயில் மறியல் செய்தவரிடம், கொள்ளையடித்த பிறகு தலித் என்று சொல்லி தப்பிக்க முயலுபவரிடம், தெருவுக்கு ஒரு குடும்பம் என்று வாழ்ந்து கொண்டு ராமன் என்ற வரலாற்று நாயகன், தந்தை சொல் மறவாதவன், ஏக பத்தினி விரதன், இந்துமதத்தை சார்ந்த பலருக்கு இறைவனான ஒருவரை, ஒரு குடிகாரன் என்று உளறுபவரிடம் அயோக்கியத்தனத்தை விட வேறு என்ன எதிர் பார்க்க முடியும்.

உள்ளாட்சி தேர்தல் கூட்டணி சரியாக அமையாததால் எல்லா கட்சிகளும் தனித்தனியாக போட்டியிட்டு, அதிமுக தான் எல்லா கட்சிகளையும் விட அதிக ஓட்டு வங்கி உள்ள கட்சி என்று மீண்டும் நிரூபித்திருக்கிறது. இதனால் ஊழல் குறைந்து விடப் போவதில்லை. ஊழல் குறைந்துவிடும் என்று நம்புபவர்களின் வரிசையில் நாம் இல்லை.

ஜனலோக்பால் குழுமத்தின் கூத்துகள்

அன்னா ஹசாரேவின் ஜனலோக்பால் குழுமத்தின் முக்கிய தலைவர்களில் ஒருவரான கிரண்பேடியின் சில தகிடுதத்தங்கள் வெளிவந்திருக்கிறது. இவருக்கு அரசாங்கம் 25% கட்டணத்தில் விமானத்தில் பயணம் செய்ய சலுகை தந்திருக்கிறது. இவர் தான் பங்கேற்கும் தொண்டு நிருவனத்தின் நிகழ்ச்சிகளுக்கும் தனியார் நிருவனங்களின் நிகழ்ச்சிகளுக்கும் போக்குவரத்து செலவாக பிஸினஸ் க்ளாஸ் கட்டணத்தைப் பெற்றுக் கொண்டு, தனக்குத் தரப்பட்டுள்ள 25% விலையில் சாதாரண க்ளாஸில் பயணத்தி மிகுதியாக வசூலித்த பணத்தை தான் தலைவராக இருக்கும் இந்தியா விஷந் பவுண்டேஷன் பெயரில் சேமித்திருக்கிறார். இதைப் பற்றி பேச்சு வந்ததும், அது அந்த நிருவனங்களுக்குத் தெரிந்துதான் செய்தேன் என்று பல்டி அடித்தார். அதில் சிலர் இது தங்களுக்குத் தெரியாது என்று சொன்னதும், அப்படி அதிகமாக பெற்றப் பணத்தை திரும்பத் தந்து விடுவதாக சொல்ல ஆரம்பித்தார், பின்னர் தான் அந்தப் பணத்தை சேமித்தேன் அதாவது ஒருவர் பணத்தை சேமித்தால் அது தவறா என்று சகட்டு மேனிக்கு உளற ஆரம்பித்திருக்கிறார்.

இவர் இப்படி என்றால் கேஜ்ரிவால் என்ற மற்றொருவர் இதுவரை ஜனலோக்பாலுக்கு வந்த நன்கொடைகளை தான் நிர்வகிக்கும் ஒரு அறக்கட்டளையில் போட்டிருக்கிறார். இது எப்படி நியாயம் என்று யாரும் கேட்கக் கூடாது. காரணம் அன்னா ஹசாரே இந்தியாவில் 13 நாள் உண்ணாவிரதம் இருந்து ஊழல் என்ற ஒன்றை ஒரே அடியாக அடித்து விரட்டி, அடுத்த மஹாத்மா என்று பெயர் பெற்றிருக்கிறார். இந்தியாவில் ஊழலே இல்லை அப்படி இருக்க அவருடைய ஜனலோக்பாலில் எங்கிருந்து ஊழல் இருக்க முடியும்.

பித்தனின் கிறுக்கல்கள் தொடரும் ......

piththanp@gmail.com

பித்தனின் மற்றப் பதிவுகளை இங்கே படிக்கலாம்

பித்தனின் கிறுக்கல்கள் - 44

2011-08-27T10:48:00.002-06:00

கண்றாவி அரசியல்

உலகம் முழுக்க இருக்கும் இந்தியர்கள் சமீபத்தில் ஒருவரை ஒருவர் பார்க்கும் போது கேட்ட முதல் கேள்வி, "அன்னா ஹசாரேவோட உண்ணாவிரதம் முடிவுக்கு வருமா?" அடுத்த கேள்விகள் "அவர் கேக்கரமாதிரி லோக்பால் மசோதாவை மத்திய அரசாங்கம் ஒத்துக்குமா? எப்படியாவது ஊழல் குறையுமா?" தான். இது எப்படி இருக்குன்னா சத்யா அவரோட உத்தமன் பதிவுல சொன்னது போல், நாம் எல்லோரும் சமய சந்தர்ப்பத்துக்கு தகுந்த மாதிரி நம் காரியம் நடக்க தவறு செய்யவும் லஞ்சம் கொடுக்கவும் தயாரா இருக்கோம், ஆனால் யாராவது வந்து எல்லாத்தையும் நிறுத்தனும் என்று எதிர் பார்க்கிறோம்.

அன்னாவுக்கும் அவரை சுத்தியிருக்கரவங்களுக்கும், ஊழல் தப்பு, ஊழல்வாதிகளை லோக்பால், ஆவின் பால், ஆட்டுப் பால், மாட்டுப்பால்ன்னு ஏதாவது ஒன்னுல பிடிச்சு போடனும், அதுல இந்தியாவில இருக்கர எவனாயிருந்தாலும், ஊழல் பண்ணினா தண்டனை சீக்கிரம் தரப் படனும். இதுக்கு தமிழ்நாடு உட்பட ஆயிரக்கணக்கானவங்க சேர்ந்து குரல் கொடுக்கராங்க அதை பத்தி யாராவது எதாச்சும் எவனாவது சொன்னான் செத்தான். நம்ம சத்யா அதை காரசாரமா விமர்சிக்க, குயில், நாகுன்னு ஆளாளுக்கு தர்ம அடி போட, அவர் பாவம் காமெடியா ஒரு பதிவு போட்டு ஒப்பேத்தியிருக்கார். அதையும் தாண்டி இந்தப் பதிவுக்காக யார் எம்மைத் திட்டினாலும் எமக்குக் கவலையில்லை.

இப்படிப் பட்ட காமெடி இந்தியா முழுக்க நடைபெறும் அதே சமயம், இந்தியாவில தமிழ்நாட்டுல இந்தியாவோட முன்னால் ப்ரதமரையும் இன்னும் பல பேரையும் குண்டு வெச்சு கொன்னவங்களுக்கு உதவியா இருந்தவங்கன்னு பல பேரை கைது பண்ணி பல வருஷங்களா அவங்களை விசாரணை பண்ணி கோர்ட் தூக்கு தண்டனை கொடுத்து அது பலப் பல வருஷங்களா கிடப்புல இருந்து சமீபத்துல அந்த முக்கிய மூன்று குத்தவாளிகளுக்கு தூக்கு தண்டனையை நிறைவேத்த முடிவு எடுத்ததுக்கு தமிழ்நாட்டுல இருக்கர அத்தனை பைத்தியங்களும் எதிர்க்க ஆரம்பிச்சுருக்குங்க. இதுனால தமிழ்நாட்டு பேர் கெட்டுப் போயிடும்ன்னு பயமா, இல்லை தமிழ்காரன் என்ன வேணா செய்யலாம் ஆனா அவனை தூக்குல போடக் கூடாதுன்ற லாஜிக்கான்னு தெரியலை. அவங்க மூனு பேரும் தப்பே செய்யலைன்னு யாரும் வாதாடலை, அவங்க தவறா கைது செய்யப் பட்டு விசாரிக்கப் பட்டு தண்டனைத் தரப் படுகின்றனர் என்று அந்த மூன்று பேரைத் தவிர யாரும் சொல்லவில்லை. சொன்னால் நீதி மன்ற அவமதிப்பு குற்றம் என்பது மிக மிக சீரியஸான ஒன்று என்று எல்லோருக்கும் தெரியும். ஆனால் இலங்கையில் பலப் பலத் தமிழர்கள் கொல்லப் பட்டிருக்கின்ற இந்த சூழ்நிலையில் இந்த மூன்று பேரையும் தமிழ்நாட்டில் தூக்குல போடக் கூடாதாம். இதில் என்ன லாஜிக் என்று நாம் கேட்கப் போவதில்லை. லாஜிக் என்ற ஒன்றை எதிர்பார்த்தால் இப்படிப் பட்ட பைத்தியங்களை பேச விடுவோமா? நேற்று, முன்னால் முதல்வர் கருணாநிதி அவர்களை 'மறப்போம் மன்னிப்போம்' ரீதியில் மன்னிப்பதுதான் மனிதாபிமானம் என்று உளறியிருக்கிறார். இந்த விஷயத்தில் இதுவரை உளறாமல் இருப்பது செல்வி ஜெயலலிதா மட்டுமே. பத்தாயிரம் பயித்தியங்களுக்கு நடுவில் இவர் மட்டும் எத்தனை நாள் தெளிவாக பேசிக்கொண்டிருக்க முடியும் என்பது தெரியவில்லை.

ஊழலைத் தடுக்கரது மட்டும்தான் அன்னாவுக்கு முக்கியம். அதே சமயம் குண்டு வெச்சு மக்களைக் கொலை செஞ்சா வெறும ஆயுள் தண்டனைதான் கொடுக்கனும். பாராளுமன்றத்தைத் தாக்கினால் மன்னிக்கனும், தீவிரவாதம் செஞ்சுகிட்டே இருக்கரவங்களை பார்த்து பரிதாபப் படனும் காரணம் இவங்களுக்கு வேலையில்லை வேலையிருந்தா இதச் செய்ய மாட்டாங்கன்னு சால்ஜாப்பு மத்திய பாதுகாப்பு அமைச்சரே சொல்வார், அதையும் மீறி மாநிலங்கள்ல தீவிரவாத இயக்கங்கள் தாக்குதல் செஞ்சா அது அந்த மாநிலத்தோட பொறுப்புன்னு அவரே பொறுப்பில்லாம பதில் சொல்வார். மும்பய்-ல ஒரு ஹோட்டல்ல தீவிரவாதிகள் தாக்கி பல வெளிநாட்டவர்கள் உட்பட பலர் இறந்த பிறகு பிடிபட்ட ஒருவனுக்கு தினமும் 1-3 கோடி ரூபாய் செலவு செஞ்சு அவனைத் தூக்குல போடாம இருப்போம் இந்த விஷயத்துல மக்களுக்கு மனிதாபிமானம் வேணும். இப்படிப் பட்ட கேணத்தனமான டயலாக்கை கேக்கனும், அன்னாவுக்கும் ஜே போடனும், இந்த ரெண்டுல எதை கேள்வி கேட்டாலும் அடிப்பாங்க.

பித்தனின் கிறுக்கல்கள் தொடரும்.....

piththanp@gmail.com

பித்தனின் மற்றப் பதிவுகளை இங்கே கண்றாவி அரசியல்

பித்தனின் கிறுக்கல்கள் – 43

2011-06-13T23:22:00.001-06:00

தமிழக ஆட்சி மாற்றம்.

எனது முந்தைய கிறுக்களுக்கு வரலாறு காணாத கூட்டமாக 100 பேர் அலைமோதி படித்ததற்கும் பின்னூட்டமிட்ட இருவருக்கும் மிக்க நன்றி. பின்னூட்டமிட்ட சண்டியர் ஜெயலலிதாவின் ஜெகதளப் ப்ராதபங்களைப் பற்றியும் அவருடைய சமீபத்திய இலவசங்களைப் பற்றியும் எழுதச் சொன்னார். எனவே எமது சில கருத்துக்கள்.

சோ அவர்கள் தேர்தலின் போது சொன்னது போல ஜெயின் இலவசங்கள் கருணநிதியின் இலவசங்களை மழுங்கடித்து மிக மிக உண்மை. பொதுவாகவே தேர்தல் நேர இலவசங்கள் எமக்கு உடன்பாடில்லை. ஒரு பொருளை வாங்கும் போது அதனுடன் தரப்படும் இலவசத்தை வைத்து வாங்கப்படும் பொருளின் தரக்குறைவு நமக்குத் தெரிவது போல தரப்படுகின்ற இலவசங்களை வைத்துப் பார்க்கும் போது அரசியல் கட்சிகளின் தரம் தெரிகிறது. ஆனால் ஒரு கட்சி மக்கள் வெறும் இலவசப் பைத்தியங்கள் என்ற ரேஞ்ஜில் ஒரு தேர்தல் அறிக்கையை வெளியிட்டவுடன் அதை முறியடிக்க ஜெயலலிதாவின் இலவசங்களை அள்ளித் தெளித்த தேர்தல் அறிக்கை பயன்பட்டது என்பதை மறுக்க முடியாது.

ஆட்சிக்கு வந்ததும் இவர் உடனடியாக ஒரு அமைச்சரை இந்தத் தேர்தல் இலவசங்களுக்காக ஒதுக்கியிருப்பது இந்த இலவசங்களில் கூடுமானவரை குழப்படியும், ஊழலும் தலைகாட்டாமல் இருக்க வேண்டும் என்ற இவரது முனைப்பைப் காட்டுகிறது. தாலிக்குத் தங்கம், அனைவருக்கும் 20 கிலோ 1 ரூபாய் அரிசி, படித்த ஏழைப் பெண்களுக்கு உதவித் தொகை என்பது சாமனியமாகத் தெரிந்தாலும், இவைகள் ஒரு சாமனியரைச் சென்றடைந்தால் இவைகள் மிகப் பெரிய சமூக மாற்றத்தைக் கண்டிப்பாகக் கொண்டுவரும் என்பது எமது கருத்து. இதை எப்படி ஒப்புக் கொள்வது? எப்படி ஒரு தாழ்த்தப் பட்ட பழங்குடி மக்களுக்கு கடந்த 60 வருடங்களாக அளிக்கப் படும் சலுகைகள் சரியோ, அதே போல பொருளாதாரத்தில் பின் தங்கியுள்ள படித்த பெண்களுக்கு (இதில் பல கோவில் அர்ச்சகர்களின் பெண்களும் அடங்குவர், என்பது உபரிச் செய்தி) தரப்படும் தாலிக்குத் தங்கம் மற்றும் உதவித் தொகையும் சரி.

ஒவ்வொரு வீட்டிற்கும் ஒரு மிக்ஸி, க்ரைண்டர் மற்றும் ஒரு மின் விசிறி இலவசம், எல்லா வீட்டிற்கும் இலவச கேபிள் டிவி இணைப்பு, வறுமைக்கோட்டிற்கு கீழே இருப்பவர் அனைவருக்கும் 20 லிட்டர் மினரல் வாட்டர் இலவசம், இதெல்லாம் மிக மிக அநாவசிய வாக்குறுதிகள். இதில் 20 லிட்டர் மினரல் வாட்டர் பிச்சைக்காரர்களுக்கும் உண்டா? உண்டென்றால், அதில் பலர் நம்மையெல்லாம் விட மிக மிக பெரிய பணக்காரர்கள். குடிசையில் இருப்பவர்கள் ஏழைகள் அவர்களுக்கு இவற்றைத் தருகிறோம் என்றால், குடிசையில் இருக்கும் பலர் மிகப் பெரிய கோடீஸ்வரர்கள், காரணம் அவர்கள் ஒன்று அரசியலில் ஏதோ ஒரு கட்சிக்கு அடியாளாகவோ அல்லது கட்டைப் பஞ்சாயத்து செய்யும் ஆளாகவோ இருக்கிறார்கள். மேலும் குடிசைகளில் நிஜமாகவே கஷ்டப்படுகின்றவர்கள் ஒன்றிலிருந்து ஐந்து சதவிகிதம்தான் என்றாலும் இந்த மினரல் வாட்டர் விஷயம் கொஞ்ச கொஞ்சமாக மறக்கப் பட்டு மறுக்கப் படும் என்று நம்பலாம். இப்படி மினரல் வாட்டர் தரப் படும் என்பதற்கு மாற்றாக, தினமும் 20 குடம் நல்ல குடிநீர் தினமும் எல்லா குடும்பங்களுக்கும் தரப் படும் என்றாவது செய்யலாம். சென்னை போன்ற மாநகரங்களில் கடும் போக்குவரத்தால் சுவாசிக்க நல்ல காற்று இல்லை, குடிக்க நல்ல குடிநீரும் இல்லை, நடக்க நல்ல சாலை வசதிகள் இல்லை, இப்படி அத்தியாவசியமான பல ‘இல்லை’களைக் களைய ஜெயலலிதா சீக்கிரம் முயலுவார் என்று நம்புகிறேன்.

வீட்டிற்கு வீடு மிக்ஸி, க்ரைண்டர், மின் விசிறி இலவசம் என்றால் இது சமுதாயத்தின் அனைத்து தரப்பு மக்களுக்குமா? ஆமென்றால், கனிமொழி, ராஜா, தயாநிதி, கலாநிதி போன்ற 300-400 கோடி வைத்திருக்கும் பணக்காரர்களுக்குமா, என்னய்யா விளையாடுகிறீர்களா?

எல்லாருக்கும் கேபிள் டி.வி. இணைப்பு இலவசமென்றால், என்ன பைத்தியக் காரத்தனமாக இருக்கிறது. டி.வி என்பது எந்தக் காலத்திலும் அத்தியாவசியமான பொருள் அல்ல. அது ஒரு ஆடம்பரம், அதனால் குழந்தைகளுக்கு பயன் உண்டு என்று அவ்வை சண்முகியில் கமலின் மனைவியாக வரும் மீனா போல ஜல்லியடிக்கலாம், ஆனால் அதில் கிஞ்சித்தும் உண்மை இல்லை. இதற்கு பதில் தேர்தல் அறிவிப்பில் அரசு கேபிள் டி.வி வினியோகத்தை ஏற்று நடத்தும் என்று சொன்னதை உடனடியாக செயல்படுத்தி குறைந்த விலையில் கேபிள் டிவி. கனெக்ஷனை மக்களுக்குத் தந்தால், அது அரசுக்கு ஒரு தெளிவான வருமானமாக இருக்கும்.

இவருடைய முந்தைய ஆட்சியில் சென்னையிலும் அதன் சுற்றுப்புறங்களிலும் தண்ணீர் பற்றாக்குறை வெகுவாக குறைக்கப் பட்டது காரணம் இவருடைய மழைநீர் சேமிப்புத் திட்டம். இந்தத் திட்டத்தை செயல் படுத்தாவிட்டால் கடுமையான நடவடிக்கை எடுக்கப் படும் என்ற இவருடைய கண்டிப்பு இத்திட்டத்தை இவரால் சரியாக நிறைவேற்ற முடிந்தது. இதோடு நிற்காமல், இவர் மீண்டும் வீராணம் திட்டத்தை தூசி தட்டிய எடுத்த போது, இத்திட்டத்தால் தான் விஞ்ஞான ரீதியாக ஊழல் செய்வதில் டாக்டர் பட்டம் பெற்றவன் என்ற பெரும் மதிப்புகுள்ளான தாத்தாதான் எமது நினைவுக்கு வந்து சங்கடப் படுத்தினார். பலரும் பல வகைகளில் இவரை இது குறித்து குறைசொல்ல அதைப் பற்றியெல்லாம் கவலைப் படாமல் இத்திட்டத்தை சிறப்பாக செயல் படுத்தி தண்ணீர் சென்னைக்கு வரச் செய்தார்.

சென்னையிலும் அதன் சுற்றுப் புறங்களிலும், தமிழகத்தின் பல பெரு நகரங்களிலும் தினம் ஒரு சில மணிநேரங்கள் மட்டும் கிடைக்கும் மின்சார வசதியை நாள் முழுவதும் கிடைக்க என்ன செய்ய வேண்டும் என்று சிந்தித்து சமீபத்தில் தனது பதவியேற்புக்கு வந்த குஜராத் முதல்வர் மோடியுடன் பேசி அவர்கள் மாநிலத்தில் உபரியாக இருக்கும் மின்சாரத்தை தமிழகத்துக்கு ஒதுக்கச் செய்திருக்கிறார் ஜெயலலிதா. இப்படி ஒரு விஷயத்தை கடந்த 5 வருடங்களாக ஏன் செய்யவில்லை என்று கேள்வி கேட்பது காலவிரயம், பாவம் கருணாநிதியும் அவருடைய அமைச்சர்களும் கிடைத்த லஞ்சப் பணத்தை எண்ணுவார்களா, இப்படி உபரி மின்சாரம் என்று மற்ற மாநிலத்திடம் கையேந்துவார்களா?

பொருளாதார ரீதியில் பின் தங்கியிருக்கும் குடும்பங்களுக்கு மாடு, ஆடு தரப் போவதாக தேர்தல் அறிவிப்பில் இருக்கிறது. இது எப்படி சாத்தியம், அத்தனை ஆடு மற்றும் மாடுகளுக்கு அரசாங்கம் எங்கே போகும் என்று தெரியவில்லை.

ஏழைகளுக்கு வீடு கட்ட ஒரு லட்சத்து 80 ஆயிரம் உதவித் தொகை தரப்படும், குழந்தைகளுக்கு வருடத்திற்கு 4 சீறுடை, செருப்பு என்ற அறிவிப்பு செய்யக் கூடியதுதான் என்று தோன்றுகிறது.

இந்த இலவசங்களினால், ஒரு அரசாங்கத்துக்கு கிடைக்கும் வரிப் பணம் பாழாகாதா என்று கேட்டால், ஆமாம் பாழ்தான், தமிழகத்தில் ஒரே ஒரு குடும்பத்துக்கு 214 கோடி ரூபாய் ஒரே ஒரு அரசாங்க ஆணையால் 2ஜி ஊழல் மூலமாகக் கிடைக்கிறது, இத்திட்டங்களினால் பல ஏழைக் குடும்பம் வீடு கட்டி (மாளிகை இல்லை சுமாரான ஒரு கருங்கல் அல்லது செங்கல் சுவர் எழுப்பப்பட்ட வீடு) வாழ முடியும். மேலும் இவைகளினால் சமுதாயத்துக்கும் பல நன்மைகளும் இருக்கின்றன, பல ஏழைகள் குடிசை வீட்டிலிருந்து கல் வீட்டுக்கு மாற 1.80 லட்சம் ஒரு ஊக்கியாக இருக்கும், பல ஆயிரக்கணக்கான ஏழைகளுக்கு சித்தாள், கொத்தனார் போன்ற கட்டிட வேலை வாய்ப்பு நிச்சயம், பள்ளிச்சீறுடை/செறுப்புத் திட்டத்தை செயல் படுத்தினால், பல ஆயிரக்கணக்கான தொழிளாலர்களுக்கு துணி நெய்யும், செருப்பு தைக்கும் வேலையின் மூலமாக வருமானம் பெருகும், அரசாங்கத்தால் வாங்கப் படும் துணிகளுக்கு தரத்தை உறுதிப் படுத்தினால், பலப் பல தையல் தொழிளாலர்களுக்கு வருமானம் கிடைப்பதோடு, ஏழைக் குடும்பத்து துணிச் செலவு கணிசமாகக் குறையும்.

இவற்றோடு மேலும் பல நல்ல அறிவிப்புகள் இருக்கின்றன அவைகள் நிறைவேற்றப் பட்டால் நிச்சயம் சமுதாயத்திற்கு நன்மைகள் பல. முதலாவதாக, முன்னால் ராணுவ வீரர்களைக் கொண்டு மின் திருட்டை தடுக்க முயற்சி, அவர்களுக்கு வரும் ஓய்வூதியம் அவ்வளவு சிலாக்கியமானதில்லை. எனது நண்பனின் தந்தை ஓய்வு பெற்ற ராணுவ வீரர், அவர்கள் குடும்பத்தில் அனைவரும் நல்ல நிலமையில் இருப்பதால் அவர்களின் தந்தைக்கு வரும் ஓய்வூதியத்தை நம்பி யாரும் இல்லை, மாறாக அவர்கள் குடும்பம் சற்று சுமாரான நிலையில் இருந்தாலும் சரி, ஓய்வூதியத்தை வைத்துக் கொண்டு 10-15 நாட்கள் காலம் தள்ளுவதே சிரமம்தான். இந்த புதிய நடவடிக்கையினால் அவர்களுக்கு கொஞ்சம் ஊதியம் கிடைக்க வழி பிறக்கும். அவர்கள் மின் திருட்டை கண்டுகொள்ளாமல் விட்டால் அதிகம் ‘கை’யில் கிடைக்கிறது என்று இருக்காமல் இருந்தால் சரி.

கிராமப்புரங்களில் சூரிய மின்சாரம் பயன்படுத்தி வீட்டிற்கு மற்றும் தெரு விளக்குகளை எரிய விட முயற்சி, +1, +2 படிக்கும் மாணவ மாணவியருக்கு லாப்டாப் என்பது சற்று பணக்காரத்தனமாக இருந்தாலும், இது வரும்காலச் சந்ததியினருக்கு மிகுந்த பயனளிக்கக்கூடிய ஒன்றாகத்தான் எமக்குத் தோன்றுகிறது.

தாத்தா இலவசமாக டிவி பொட்டியைக் கொடுத்துவிட்டு கோடி கோடியாக சுருட்டிய போது அதைப் பற்றி யாரும் பேசவில்லை, தனது சமீபத்திய தேர்தல் அறிக்கை ஒரு கதாநாயகி என்று விளம்பரமாக சொன்னபோதும் யாரும் அவரை கேள்வி கேட்கவில்லை. அதை முறியடிக்கும் விதமாக ஜெயலலிதா அறிக்கை வெளியிட்டதும் அனைவரும் அதைக் கேள்வி கேட்கிறோம். காரணம் இவர் சொன்னால் செய்து விடுவார், தாத்தா சொன்னால் ‘வரும்ம்ம்ம்ம்ம், ஆனானானா, வராராராராது’ ன்னு நம் எல்லோருக்கும் தெரியும்.

தி.மு.கவின் சமீபத்திய முடிவு

தி.மு.க. தனது உயர் நிலை செயல் திட்டக் குழுவை சமீபத்தில் கூட்டி அதில் சில தீர்மானங்களை வெளியிட்டிருக்கிறது. அதில் எல்லாமே வெட்டியாக இருக்க, இப்படி இவர்கள் செய்யும் கேலிக்கூத்தை இத்தனை வருடங்கள் இவர்களது கட்சித் தொண்டர்கள் எப்படி சகித்துக் கொள்கிறார்கள் என்பது எமக்கு ஒரு புரியாத புதிர்.

- திமுகவினர் மீது சிபிஐ தொடர்ந்துள்ள பொய் வழக்குகளை எதிர்த்து உச்சநீதிமன்றத்தில் மேல் முறையீடு செய்வது.

சி.பி.ஐ. வழக்கு தொடராத வரையில் 214 கோடி விஷயம் வெளியில் வரவே இல்லையே, 214 கோடி + வட்டி போச்சே என்ற எரிச்சலுக்கெல்லாம் கேஸ் போட்டா உள்ளதும் போச்சு நொள்ளகண்ணாங்கர கதைதான். ஜாக்கிரதை.

- திமுக ஆட்சிக்காலத்தில் கட்டப்பட்ட புதிய தலைமைச் செயலகம் மாற்றப்பட்டதற்கு கண்டனம்.

அதுதான் இவர்களது அடிப்பொடிகள் பொதுநல வழக்குன்னு ஒன்னு பதிவு பண்ணி, அதுக்கு அம்மையார் சரியான பதிலைச் சொல்லி அவர்கள் வாயை அடைத்து விட்டு, கூடவே அதில் நடந்துள்ள முறைக்கேடுகளை ஆராயச் சொல்லி ஒரு விசாரணைக் கமிஷன் அமைக்கப் படும் என்று கவர்னர் உரையிலேயே சொல்லிவிட்டார். அடுத்து, ஸ்டாலினுக்கு கண்டம் ஆரம்பிச்சாச்சு.

- தமிழகத்தில் சட்டமேலவை ரத்து செய்யப்பட்டதற்கு கண்டனம்.

அதுக்கு மேல ஒன்னும் பண்ண முடியாது. இந்த மேல்சபை என்பது பொதுமக்களில் பலருக்கும் சட்டசபைக்கு செல்ல ஒரு குறுக்கு வழி நாடாளுமன்றத்தில் ராஜ்ய சபா உறுப்பினர் போன்ற ஒரு பதவி. இது யாருக்கு உதவியதோ தெரியாது, தமிழகத்தில் ம.போ.சி என்ற ஒருவருக்கு மிக மிக உதவியாக இருந்தது. இதை எம்.ஜி.ஆர். நீக்கும் வரை அவர் மேல் சபையின் உறுப்பினராக இருந்தவர். இதனால் ஆளும் கட்சியின் வட்டம் மாவட்டம் ன்னு இருக்கர மக்களுக்கு ஒரு உதவியாக இருக்கும் அவ்வளவுதான். இது இல்லாமல் இருப்பது தமிழக அரசுக்கு கொஞ்சம் பணம் செலவில்லாமல் இருக்கும். ஆனால் இது வேண்டாம் என்பதற்கு ஜெயலலிதா சமீபத்தில் சட்டசபையில் சொன்ன உதாரணம் சிறுபிள்ளைத் தனமாக இருந்தது.

சமச்சீர் கல்வித் திட்டம் தொடர்பான சென்னை உயர்நீதிமன்றம் பிறப்பித்துள்ள தீர்ப்புக்கு வரவேற்பு. இந்தத் தீர்ப்பை ஏற்று நடப்பு ஆண்டே சமச்சீர் கல்வியைத் திட்டத்தை தமிழக அரசு அமல்படுத்த வேண்டும்.

இந்த சம்ச்சீர் கல்வியைப் பற்றி எமக்கு அவ்வளவாகத் தெரியாததால், அது பற்றி சற்று வலைத்தளத்தில் தேடி படித்தவுடன் எழுதுகிறேன்.

இலங்கைக்கு பொருளாதார தடை விதிக்க்க கோரி தமிழக சட்டசபையில் நிறைவேற்றப்பட்ட தீர்மானத்திற்கு வரவேற்பு.

இது ஜெயலலிதாவின் ஒரு சின்ன ஸ்டண்ட் அவ்வளவுதான். நான் பலமுறை சொன்னது போல் இலங்கை ப்ரச்சனை என்ன என்பதை பலரும் (நான் உட்பட) முழுவதும் புரியாமலேயே தங்களது கருத்தை அள்ளித் தெளித்துக் கொண்டிருக்கிறோம். முதலில் அங்கு நடந்தது ஒரு தீவிரவாத ஒழிப்பு நடவடிக்கை. அதில் பல ஆயிரக்கணக்கான அப்பாவி தமிழர்கள் கொல்லப் பட்டார்கள் என்பது கண்டிப்பாக கண்டிக்கப் படவேண்டிய ஒன்று ஆனால் அப்படி அந்த அப்பாவி மக்கள் தாக்குதலுக்கு முன்பும், தாக்குதலுக்கு நடுவிலும் தப்பி பாதுகாப்பான இடங்களுக்கு செல்ல முடியாமல் இத்தனை ஆண்டுகாலங்களும் அவர்களை பணயக் கைதிகளாக வைத்திருந்தது விடுதலைப் புலிகள் என்ற குற்றச்சாட்டுக்கு இதுவரை தமிழ்நாட்டைச் சார்ந்த இலங்கைத் தமிழரின் பாதுகாவலர் என்று பறைசாற்றுவோர் எவரும் பதில் தரவில்லை. அது ஏன்? முன்பு எம்.ஜி.ஆர், இலங்கைத் தமிழரைக் காக்க தினமும் கருப்பு சட்டை போட்டு போராட்டம் நடத்தினார், அதற்கும் ஜெயலலிதாவின் இன்றைய ஸ்டண்டுக்கும் எந்த வித்தியாசமும் இல்லை. எஸ்.வி.சேகரின் ஆயிரம் உதை வாங்கிய அபூர்வ சிகாமணி என்ற நாடகத்தில் ஒரு காட்சி.

பேட்டியாளர்: இலங்கைத் தமிழர் ப்ரச்சனைக்கு என்ன தீர்வு

சேகர்: ஆ, அதுவா, அதுக்கு நாங்க மிகப் பெரிய திட்டம் வெச்சு இருக்கோம்.

பே: என்ன திட்டம் சொல்லுங்க:

சே: தமிழன் தூங்கும் புலி, அவனை சும்மா சீண்டாதீங்க

பே: என்ன செய்யப் போறீங்க சொல்லுங்க:

சே: தமிழன் இதையெல்லாம் பாத்துக்கிட்டு சும்மா இருக்க மாட்டான்.

பே: என்ன நடக்க போவுது சொல்லுங்க:

சே: தமிழன் கொதிச்சு எழுந்தா இலங்கை தாங்காது.

பே: என்னதான் பண்ணப் போறீங்க, கொஞ்சம் சொல்லுங்க சார்.

சே: யோவ் அங்க இன்னா நடக்குதுன்னு யாருக்குய்யா தெரியும், சும்மா இப்படி உதார் உட்டுகினே இருந்தா அதுவா ஒரு நாள் தானா சரியா பூடும்.

பே: (சலிப்பாக) அது சரி.

சே: ஆனா ஒரு விஷயம் செய்தா இலங்கை அப்புடியே நடு நடுங்கி பூடும்.

பே: அது என்ன சார்

சே: எல்லா எல்கேஜி க்ளாஸுக்கும் ஒரு வாரம் லீவ் விட்டா இலங்கை அப்படியே நடுங்கி பூடும் எப்டி நம்ம ஐடியா?

இப்படித்தான் தமிழக அரசியல்வாதிகள் இலங்கை தமிழர்களின் வாழ்வில் தினம் தினம் விளையாடிக் கொண்டிருக்கிறார்கள்.

இந்த ஸ்டண்டுக்கு நடுவில் ஜெயலலிதா ஒரு நல்ல கோரிக்கையை எழுப்பியுள்ளார் அது தமிழ் மக்களை நல்ல முறையில் குடியேற்றம் செய்து அவர்களுக்கு ஒரு நல்ல வாழ்வை அமைத்துக் கொடுக்க என்ன செய்ய வேண்டுமோ அதை உடனடியாகச் செய்யவேண்டும் அது நடவாத பட்சத்தில் இந்தப் பொருளாதார தடையை உடனடியாக செய்ய வேண்டும். இதை இப்போது யாரும் செய்வதாகத் தெரியவில்லை, இவரது டெல்லி விஜயத்தில் இதைப் பற்றி காது கேளாத, கண் தெரியாத, வாய் பேசாத ப்ரதமரிடம் எப்படி சொல்வாரோ என்னவோ, அப்படிச் சொல்லியும் அந்த கறை படியா கையர் காங்கிரஸ் தலைமையை மீறி என்ன சாதிக்க முடியுமோ தெரியவில்லை. . ஆனால், கடையடைப்பு, பள்ளிகளுக்கு விடுமுறை, ராமேஸ்வரத்தில் கூட்டம், நாகப்பட்டிணத்தில் கூட்டம், சென்னையில் கூட்டம், காலை இட்லி காபி சாப்பிட்டு விட்டு மதியம் வரை உண்ணாவிரதம் என்று கழகங்கள் தமாஷ் செய்து கொண்டிருப்பதாலும் என்ன பயன் என்று தெரியவில்லை.

மு.க. டமாஸ்

தாத்தா, ஏகத்துக்கும் கடுப்பில் இருக்கிறார் என்பது அவரது சமீபத்திய பத்திரிகை பேட்டியில் தெரிகிறது. அந்தக் கண்றாவியை நான் வேறு எழுதுவானேன். அதை இட்லி வடையில் விலாவரியாக போட்டிருக்கிறார்கள். எங்க ஊரில் ஒரு வஜனம் சொல்வார்கள், நாயை யாராவது அடித்தால் அதற்கு எங்கு அடிபட்டாலும் அது முதலில் காலைத்தான் நொண்டும் என்று, அது தாத்தாவின் விஷயத்தில் சரியாக பொருந்தும். தமிழகத்தில் 2 %க்கும் குறைவான ஒரு கூட்டம் பார்ப்பனர்கள் இவர்கள் தாத்தாவை ஆட்சியிலிருந்து இறக்கி விட்டார்களாம். இவங்க செஞ்ச ஊழல் கொஞ்சம் நஞ்சமில்லை, அடித்த கோடிகள் இமயமலையை விட பெரிசா இருக்கு இதுல 2% மக்கள் சேர்ந்து இவரை கவுத்துட்டாங்களாம்.

இந்து மதச் சின்னங்கள்

இதைப் பற்றி சமீபத்தில் நமது வலைப்பூவில் வேதாந்தி எழுதியிருக்கிறார். இவரிடம் ஒருவித தேடல் இருக்கிறது ஆனால், எழுத்தில் கோர்வையில்லாததால் (நான் கிறுக்குவது கோர்வை என்று சொல்ல வரவில்லை, கோர்வையாக இருந்தால் நான் ஏன் கிறுக்குகிறேன்) சொல்ல வந்த விஷயம் வில்லங்கத்தில் முடிந்துவிடுகிறது என்பது எமது கருத்து. சமீபத்தில் பூணூல் பற்றிப் பேச முடிவு செய்து, கேள்வி ஞானம் என்று குழப்பி., நாம் ஒரு கேள்வி கேட்டவுடன், அரசியல், மதச் சாயம் என்று ஜல்லியடிக்கத் துவங்கிவிட்டார்.

இந்து மதம், ஹிந்துத்வா என்று தைரியமாக முழங்கும் பாஜக வில் தலைவர்களாக முஸ்லீம்கள் இருக்கிறார்கள். ஆனால் முஸ்லீம் லீக் கட்சியிலோ, மனித நேய மக்கள் கட்சியிலோ ஒரு இந்து தலைவராக இருக்கிறாரா? பெருவாரியான முஸ்லீம்கள் இருக்கும் பகுதியில் கூட குஜராத்தில் பாஜக வினால் பெரும் வாக்கு வித்தியாசத்தில் வெற்றிப் பெற முடிகிறதே இது எப்படி? பாஜகவை எதையாவது சொல்லவேண்டும் என்றால், உடனே மதச்சார்பற்ற ஜனநாயக கூட்டனி என்று ஜல்லியடித்து ஊழல்வாதிகள் அனைவரும் சேர்ந்து கொள்கிறார்கள், அதைக் கேட்டால், நாம் மத வெறிப் பிடித்தவர்கள். மைனாரிடிகளுக்கு எதிரானவர்கள். அடப் போங்கப்பா.

வேதாந்தி தனது பதிவினைத் தொடர்ந்து எழுதப் போவதாக இருந்தால், அவர் தெளிவு1, 2, என்றே வைத்துக் கொண்டு இப்படி பல விஷயங்களைப் பகிர்ந்து கொண்டிருக்கலாம், எமது கிறுக்கல்களைப் போல, அதை விடுத்து, இந்து மதச் சின்னத்தை மையமாக தலைப்பாக வைத்துவிட்டு, அதைப் பற்றி கேள்வி கேட்டால், மதத்தையும் அரசியலையும் இழுக்காதீர்கள் என்று சொல்லி அதை அவரே இழுத்திருகிறார்.

நடுத்தெரு அநாகரிகம்

திரு. மு. கோபாலகிருஷ்ணனின் நடுத்தெரு அநாகரிகம் என்ற பதிவினைப் படித்தவுடன் பொது இடத்தில் மனைவியை ஒருவன் காட்டுமிராண்டி போல அடித்துவிட்டு எப்படி எதுவும் நடவாதது போல இயல்பாக இருக்கமுடிகிறது. என்ன வளர்ப்பு இவர்களது வளர்ப்பு என்று எமக்குத் தோன்றியது. இந்த அநாகரிகத்தை பார்த்து விட்டு அதைப் பற்றி எப்படி நண்பர் மு.கோ. வினால் எழுத முடிந்தது என்ற ஆச்சர்யமும் எமக்கு விலகவில்லை.

இன்று இந்தப் பதிவைப் பற்றி எழுதுவதற்குக் காரணம், இந்தப் பதிவிற்கு இன்று மதியம் இடப்பட்ட ஒரு பின்னூட்டம். பின்னூட்டமிட்டவர் ஆங்கிலத்தில் எழுதியதை வரிக்கு வரி விமர்சனம் செய்யவும் விவாதிக்கவும் ஏதுவானது இருந்தாலும், இப்படிக் கூட தரம்தாழ்ந்து ஒருவர் சிந்திக்க முடியும் என்பதே ஆச்சர்யமாக இருக்கிறது. இந்தப் பதிவில் வரும் கணவர்களில் ஒருவராவது இப்படி ஒரு செயலை அமெரிக்காவில் செய்திருந்தால், அடுத்த 20 நிமிடங்களில் அவர் கைது செய்யப்பட்டு, இப்படி கேவலமாக நடந்துகொண்டதற்கு தகுந்த தண்டனை பெற்றிருப்பார்.

இவரது பார்வை ஏன் இப்படி ஒரு கோணல் பார்வையாக இருக்கிறது என்று தெரியவில்லை. 10-15 வயது சிறுவன் பக்கத்தில் அமரும் 40 வயது பெண்மணியின் கற்பைப் பாதுகாக்கவே அவருடைய கணவர் அவரைப் பொது இடத்தில் தரக்குறைவாகப் பேசி அடிக்கிறார். அது சரி என்பது பின்னூட்டமிட்ட இவருடைய வாதம். குழந்தைக்காக இன்னொரு கணவன், மனைவியை பொது இடத்தில் அடிக்கிறான், ஆனால் அந்தக் குழந்தை கீழே விழும் வரை என்ன செய்து கொண்டிருந்தான். இதுவும் சரி என்று வாதிடுகிறார் இவர். இதோடு நிற்காமல், தனது இஷ்டத்திற்கு ராமாயணத்தை மேற்கோள் காட்டி வாதிட்டிருக்கிறார். இவருக்கு சீதைக்கு ராமன் சித்தப்பா என்ற அளவில்தான் ராமாயணம் தெரியும் என்பது இவரது மேற்கோளில் இருந்து தெரிகிறது. ராமர் சீதையை அக்னிப் ப்ரவேசம் செய் என்று சொல்லும் போது எல்லோரும் கண்டிக்கிறார்கள். மாண்ட அவருடைய தகப்பனார் தசரதன் வந்து சொல்கிறார் இது தவறு என்று, தேவர்கள் வந்து கண்டிக்கிறார்கள். வால்மீகி கண்டிக்கிறார், கண்டிப்பதோடு அவரிடத்தில் சொல்கிறார் நீ யார் என்பது தெரியாதா, சீதை யார் என்பது தெரியாதா, ஏன் இப்படி செய்கிறாய் என்று அவரை கடிந்து கொள்கிறார். அதற்கு ராமன் கூறும் பதில் நான் தசரத குமாரன் ராமன். நான் கடவுள் இல்லை என்கிறார். மேலும் அப்படி அக்னிப் ப்ரவேசம் செய்யும் போது சீதை ஒரு தாய் இல்லை.

அடுத்து, கணவனை இழந்த இளம் பெண்கள் தங்கள் தலையை மழித்து இரண்டாம் தர வாழ்க்கை வாழ்கிறார்களே, அவர்கள் தங்கள் சுகங்களையெல்லாம் இழந்து விட்டார்களே என்று ஆதங்கப் பட்டிருக்கிறார். இப்படி கணவன் என்ற காட்டுமிராண்டியிடம் பொது இடத்தில் கேவலமான பேச்சும், அடியும் உதையும் வாங்கிக் கொண்டு வாழ்வது மேல் என்று சொல்லும் இவர் ஆணாதிக்க தன்மை கொண்டவர் இல்லை, இப்படி இருக்கும் ஆண்களை நமக்கு வெளிப்படுத்தும் மு.கோ, மற்றும் நாம் ஆணாதிக்க வெறியர்கள். வெரி குட்.

இவரது பின்னூட்டத்தின் முக்கிய செய்தி, வெகு சிலரே, நமது கலாச்சார வட்டத்திற்கு அப்பால் யோசித்து, ஒரு புது கலாச்சாரத்தை கைக்கொள்ளும் சந்தர்ப்பம் கிட்டியவர்கள். அப்படிப் பட்டவர்கள் செய்யும் சில செய்கைகள் நம்மில் சிலருக்கு அருவருப்பை உண்டு பண்ணக்கூடியதாக இருந்தாலும், அவைகள் வைத்து மட்டும் அவர்கள் காட்டுமிராண்டிகள் என்று கருதமுடியாது. முத்தாய்ப்பாக மு.கோவின் பதிவில் நமக்கு அறிமுகம் செய்யப் பட்ட காட்டுமிராண்டிகளை நாம் நமது குறைப் பட்ட பார்வையில் பார்ப்பதாகவும், அவர்கள் வேறு பல வகைகளில் ஒரு நல்ல கணவனாகவும், நல்ல தகப்பனாகவும் இருக்கக்கூடிய ஒரு சாத்தியக்கூற்றை நாம் காணாமலும், அறியாமலும் இருக்கக்கூடிய வாய்ப்பிருக்கிறது என்று பின்னூட்டமிட்டவர் முடித்திருக்கிறார். இப்படிப் தரம் தாழ்ந்து சிந்திக்கும் மக்கள் இருக்கும் வரையில் சமுதாயத்தில் எந்தப் பெண்ணிற்கும் எந்த நல்லதும் நடவாது. வாழ்க இவரது எண்ண ஓட்டம். வளர்க இவரது முற்போக்கு சிந்தனை.

பித்தனின் கிறுக்கல்கள் தொடரும்.....

piththanp@gmail.com

பித்தனின் மற்றப் பதிவுகளை இங்கே படிக்கலாம்

பித்தனின் கிறுக்கல்கள் – 42

2011-05-28T22:53:00.006-06:00

டெல்லியில் தி.மு.க.

திஹார் ஜெயிலில் கனிமொழி அடைக்கப் பட்டாரோ இல்லையோ, எமக்கு சில நண்பர்கள் நேரிலும், தொலைப் பேசியிலும் “என்ன இதைப் பற்றி நீ என்ன நினைக்கிறாய், இதைப் பற்றி கொஞ்சம் விலாவரியாக எழுதக்கூடாதா” என்று கேட்டு நான் என்னவோ சட்ட வல்லுனர்போலவும், நாம் சொல்வதை நம் வீட்டிலேயே யாரும் சீரியசாக எடுத்துக் கொள்வதும் இல்லை என்ற உண்மை கிஞ்சித்தும் தெரியாமல், நாம் சொல்வது சரி என்று பாவம் நினைத்துக் கொண்டிருக்கிறார்கள், அவர்களை ஏமாற்றாமல் இதோ நம் பக்க கருத்து.

கனிமொழியைப் பற்றி நாம் எழுத நேரிடும் என்று கனவிலும் நினைத்ததில்லை. ஹூம் தலையெழுத்து.

அதற்கு முன்னால், என்னுடைய முந்தைய பதிவை படித்த (அல்லது எமது வலைபூவை பார்க்க வந்த) 58 பேருக்கும், பின்னூட்டமிட்ட நாகுவிற்கும் நன்றி.

முதலில் சில விஷயங்கள், கனிமொழி ஒரு பெண், ஒரு தாய், ஒரு ப்ராந்தியக் கட்சித் தலைவரின் மகள், ஒரு கண்ணியமான ராஜ்யசபா எம்.பி. போன்ற கருத்துக்கள் இருப்பவர்கள் தயவு செய்து அடுத்த செய்திக்கு செல்வது உத்தமம். இந்த உதவாக்கரை வாதங்கள் எமக்கு எந்த காலத்திலும் ஏற்புடையதில்லை.

ஒரு தொலைக்காட்சி நிறுவனத்தின் மொத்த மதிப்பு சில கோடிகள் இருக்க, அதில் பங்குதாரராக இருக்க ஒரு நிறுவனம் அதன் மதிப்பை விட 20 மடங்கு பணம் தந்ததாகவும், அதை அந்த நிறுவனம் நிராகரித்ததால் அந்தப் பணத்தை அவர்கள் கடனாகத் தந்ததாகவும், அந்த நிறுவனத்தில் தனது தந்தை கையெழுத்துப் போடச்சொல்லி 20% பங்குதாரராக ஆக்கியதால் ஆனதாகவும், அதைத் தவிர தான் அதன் எந்த தினப்படி நிர்வாகத்திலும் பங்கு பெறவில்லை என்றும் கதை சொல்லும் கனிமொழி, எப்படி இந்தப் பணவிஷயம் பற்றி இவ்வளவு விலாவரியாக சொல்ல முடிந்தது. இவர்தான் அந்த நிறுவனத்தின் எந்த செயல்பாட்டிலும் தலையிடாமல் இருந்தவராயிற்றே? ஒரு பேச்சுக்கு இந்த கதையை இப்படி அணுகிப் பார்க்கலாம், நான் ஒரு கம்பெனி இங்கு ஆரம்பித்து அதன் மதிப்பு 1000$ என்று வைத்துக் கொள்ளுங்கள், அதை ஒரு பெரிய பணக்கார கம்பெனி ஒன்று 20000$ முதலீட்டில் சில பங்குகள் வாங்க முயற்சித்தால் அதை யாராவது நம்புவார்களா? எங்க ஊரில் ஒன்று சொல்வார்கள், “கேக்கரவன் கேணையான இருந்தா கேப்பையில் நெய் வழியுதுன்னு சொன்னா நம்புவான்” ன்னு அதைப் போல இப்படி ஒரு கதை சொல்லி பிறகு அதை கடன் என்று சொல்லி, பிறகு அதை அவர்கள் திருப்பித் தந்தமாதிரி செய்து, அந்தப் பணம் அஞ்சுகம் பிக்சர்ஸ் உதவியால் திருப்பியதாக செய்து அதற்கு ஆவணங்கள் தயாரிக்கப் பட்டு, இத்தனை தில்லு முல்லுகளையும், ராஜா கைதுக்குப் பிறகு செய்து அதை திறம்பட செய்து முடித்தப் பிறகு சி.பி.ஐ மற்றும் அமலாக்கப் பிரிவு அதிகாரிகளை கொண்டு ஒரு விசாரணை என்ற பேரில் ஒரு கண் துடைப்பு போலச் செய்து பிறகு உச்ச நீதி மன்றம் இந்த வழக்கை தனது சுய பொறுப்பில் எடுத்துக் கொண்ட பிறகு இந்தக் கைது நடை பெற்றுள்ளது.

சி.பி.ஐயின் சில செயல்பாடுகளும் சந்தேகத்துக்குரியவைதான், 20% பங்குதாரர்கள் கனிமொழி மற்றும் சரத்குமார் கைது சரி, 60% பங்குதாரர் தயாளு அம்மா ஏன் கைதாகவில்லை, அவருக்கு வயதாகிவிட்டது, அவருக்குத் தமிழைத்தவிர வேறு மொழி தெரியாது என்று விட்டு விட்டோம் என்று சி.பி.ஐ சப்பை கட்டு கட்டியிருக்கிறது. ஆக இந்தியாவில் வயதானவர்கள் நல்லவர்கள், அதுவும் ஆங்கிலம் தெரியாமல் தாய் மொழி மட்டும் தெரிந்தவர்கள் கைதுக்கு அப்பாற்பட்டவர்கள், நல்ல லாஜிக், அப்படின்னா 71 வயது முலயம் சிங் யாதவும், 63 வயது லாலு ப்ரசாத் யாதவும் எந்தத் தில்லு முல்லு செய்தாலும் தண்டனையில்லை. சூப்பர், இப்படி ஒரு புலனாய்வு நிறுவனம் அதற்குத் தலைமை தன்னிகரில்லாத உலகத் தலைவர்களிலேயே அதிகம் படித்தத் தலைவர் மன்மோகன் சிங். வாழ்க ஜனநாயகம், வளர்க அவர்கள் அறியாமை.

சரி தொடங்கியப் ப்ரச்சனைக்கு வருவோம். வாங்கிய 214 கோடியை வட்டியுடன் திருப்பித் தந்தீர்கள், இவைகள் ஏன் எழுத்துப் பூர்வமாக இல்லை? வட்டி எவ்வளவு என்று ஏன் ஒருவரும் கேட்கவில்லை? வாங்கிய பணத்தை என்ன செய்தீர்கள்? வாங்கிய பணத்தில் எந்த தேச விரோத செயலும் செய்யவில்லை என்று யார் உத்தரவாதம் தந்தார்கள்? சாதாரணமாக ஒரு இந்திய வங்கியில் 50000 ரூபாய்கள் எடுக்கவோ அல்லது கணக்கில் வரவு வைக்கவோ முக்கியத் தேவை பான் கார்டு நம்பர், இது நம்மைப் போன்ற பொது ஜனங்களுக்கு ஒரு நிறுவனம் சட்டென்று 214 கோடியை வாங்க முடிகிறது, அதை சட்டென்று வட்டியுடன் திரும்பத் தர முடிகிறது எப்படி? இந்தப் பணப் பட்டுவாடாவில் தொடர்புடைய வங்கிகள் யார்? அவர்கள் எப்படிப் பட்ட ஆவணங்களை தயார் செய்து இந்த பட்டுவாடாவை செய்தார்கள். இதெல்லாம் இந்த விசாரணையில் வெளிவரும் என்று எமக்கு நம்பிக்கையில்லை.

கனிமொழி ஒரு பெண்:

ஜெயலலிதாவும் ஒரு பெண், தாத்தாவின் ஆட்சிக்காலத்தில் அவர் சட்டசபையிலேயே அவமானப் படுத்தப் பட்டது மறந்து விட்டதா, மேலும் அவரைப் பற்றி சேரிகளில் தினமும் தமிழில் சொல்ல முடியாத வார்த்தைகளில் போவோரையும் வருவோரையும் குடித்து விட்டு ஏசும் பல கழிசடைகளைப் போல சமீபத்திய தேர்தலில் ப்ரசாரத்திலும் பேசிய முத்தமிழ் வித்தகருக்கு ஜெயலலிதா ஒரு பெண் என்பது மறந்து விட்டதா? பெண் என்று பார்த்துத்தான் ஜெயலலிதா ஜெயிலில் மற்றக் கைதிகளைப் போல வைக்கப் பட்டாரா? சோ சொன்னது போல ஜெயலலிதா ஒரு ஆணைப் போலத்தான் தனக்கு நேர்ந்த அவமானங்களையும் கஷ்டங்களையும் சகித்துக் கொண்டார், தாத்தாவைப் போல சாதாரண ஒரு கைதுக்கு “ஐய்யோ கொல்ராங்களே” என்று அழுது அடம்பிடித்து அதையே திரும்பத் திரும்ப தொலைக்காட்சியில் காண்பித்து போன முறை ஆட்சியைப் பிடித்தாரே அதைப் போல செய்யாமால் தன் திறமை, தனது ஆட்சியின் கண்டிப்பு, தேர்ந்த நிர்வாகத் திறமை இவைகளைச் சொல்லி மீண்டும் ஆட்சிக்கு வந்திருக்கிறார்.

கனிமொழி ஒரு தாய்:

ராப்ரி தேவியும் ஒரு தாய்தான், அவர் செய்யாத குற்றமா? இந்தியா இத்தனை குட்டிசுவரானதுக்குக் காரணமான இந்திராவும் ஒரு தாய் அவர் செய்யாத குற்றமா? இது என்ன லாஜிக், இதைக் கேட்டு தாய்மார்கள் கண்ணீர் சிந்தி மக்களின் அனுதாபம் இவர்கள் பக்கம் வந்துவிடும் என்று எண்ண ஆரம்பித்தால் இவர்கள் பைத்தியக்காரர்களா அல்லது இவர்கள் இப்படி நினைக்கலாம் என்று இவர்களை விட்டு வைத்திருக்கும் மக்கள் பைத்தியக்காரர்களா?

இவர் ஒரு ப்ராந்தியக் கட்சித் தலைவரின் மகள்:

அதாவது ஒரு கட்சித் தலைவரின் மகள் (நேர்மையான வாரிசோ அல்லதோ அது நமக்குத் தேவையில்லாத விஷயம்), கைதுக்கு அப்பாற்பட்டவர், ஹும் “நல்லாத்தான் கதை எழுதராங்க”.

ஒரு கண்ணியமான ராஜ்யசபா எம்.பி.

ராஜ்யசபா எம்.பி என்பது பலருக்கு ஒரு குறுக்கு வழி எம்.பி பதவி (பாமக – அன்புமணி, மன்மோகன் சிங் என்று பட்டியல் நீளும்) அதே சமயம் பல நல்லவர்களும் இந்தியாவின் பாராளுமன்றத்தின் சட்ட திட்டங்களின் தீர்மானங்களில் பங்கு பெற்று தங்களின் கருத்தை வெளிப்படுத்தி பல நல்ல செயல்களைச் செய்ய முடியும் (சோ, செழியன், டாக்டர் ராஜா ராமன்னா மற்றும் பலர்), ஆக ராஜ்யசபா எம்.பி என்பதால் இவர் கைதுக்கு அப்பாற்பட்டவர் என்பது ஏற்க முடியாத ஒன்று.

இந்தப் பதிவு வெளிவரும் நேரம் தயாநிதி மாறன் சோனியா காந்தியைச் சந்தித்து பேசியிருப்பதாக தகவல்கள் வருகிறது, சமீபத்தில் டெல்லி சென்று கனிமொழியை சிறையில் பார்த்து கதறி அழுத தாத்தாவும், சோனியாவை பார்க்கவில்லை பார்த்தால் யாராவது ஏதாவது சொல்வார்கள் என்று பார்க்கவில்லை என்று சொல்லியிருக்கிறார். அதாவது இந்தியாவில் எது நடக்க வேண்டும் என்றாலும் யாரும் ப்ரதமரைப் பார்த்து சொல்ல வேண்டும் என்று சொல்வதில்லை, சோனியாவைப் பார்த்தால் போதும் என்று தீர்மானமே செய்திருக்கிறார்கள். இப்படி ஒரு ப்ரதமர், இவர் வடிவேலு படத்தில் வருவது போல “ரொம்ப நல்லவரு” என்று யார் சொன்னாலும் சொல்லாவிட்டாலும் தானே சொல்லிக் கொள்வார். ஹூம் பாரதி சொன்னான், “சீச்சீ நாயும் பிழைக்கும் இப் பிழைப்பு” இது இவருக்குத்தான் போல இருக்கிறது.

இந்த வழக்கின் போக்கு எப்படி இருக்கும் என்று எம்மிடம் ஆரூடம் கேட்டவர்கள் சிலர் அவர்களுக்காக எம் கருத்து இரு வழிகளில் ஒன்று சி.பி.ஐ சரியாக தங்கள் கடமைகளைச் செய்தால், இரண்டு அராஜகம் தலைவிரித்தாடினால். இதில் இரண்டாவது நடக்காமல் இருந்தால் எம்மைவிட அதிக சந்தோஷம் அடையப் போவது யாரும் இல்லை.

முதலில் சி.பி.ஐ ஒழுங்காக தங்கள் கடமையைச் செய்தால்:

1. சரத்குமார் அப்ரூவர் ஆகலாம், ஆனால் உயிரோடு இருப்பாரா என்பது சந்தேகம். ஒரு வேளை அப்படி அவருக்கு ஏதும் நடக்காமல் இருந்தால் கனிமொழியோடு தயாளுவும் உள்ளே போக நேரிடும்.

2. சரத் அப்ரூவராகாமலேயே, உச்ச நீதி மன்றம், தயாளுவை ஏன் கைது செய்யவில்லை என்று சி.பி.ஐயை குடாய்ந்தால் அவர் உள்ளே செல்ல நேரிடும்.

3. சோ சொன்னது போல இந்திய கிரிமினல் சட்டத்தில் “ஒருவரின் மனைவி, மகள் ஏன் அவருடைய வேலைக்காரனே தவறான வழியில் பணம் சம்பாதித்திருந்தால் அதற்கும் அவருக்கும் தொடர்புள்ளது என்று அவரையும் விசாரணைக்கு உட்படுத்தப் படவேண்டும்” என்பது இருந்தால் தாத்தாவும் சக்கர நாற்காலியோடு உள்ளே போய் களி திங்க வேண்டியதுதான்.

4. தயாநிதி மாறன் தனது தொலைத் தொடர்பு அமைச்சர் காலத்தில் செய்த அட்டூழியங்களுக்காக கைது செய்யப் படும் வாய்ப்பிருப்பதாக தகவல்கள் வரத் தொடங்கியிருக்கிறது, அதைத தவிர்க அவர் அப்ரூவராக ஆனால், இன்னும் எத்தனை தலைகள் திஹாருக்கு போக வேண்டுமோ.

5. தாத்தா இனி தாங்காதுடா சாமின்னு மண்டையைப் போட்டால், நடைபெறும் அடிதடியில் கனியுடன் ராசாத்தியும் உள்ளே போக, தயாளு தப்பித்து சொந்த ஊருக்கு பயணப்படலாம்.

அராஜகம் தலைவிரித்தாடினால்:

1. ராஜாவோ அல்லது வேறு யாரோ, யார் பெயர் உங்கள் மனதில் வருகிறதோ அவர் பெயரை எழுதிக் கொள்ளுங்கள். அவர் சோனியாவிடமோ அல்லது யாராவது ஒருவரிடம், என்னிடம் ராஜாவை யார் இப்படி நடந்து கொள்ளச் சொல்லி சொன்னார் என்பதற்கான ஆதாரம் இருக்கிறது என்றால், இந்த வழக்கின் திசை மாறி கனிமொழி, ராஜா இருவரும் வெளியே வந்து விடுவார்கள், கைதான மற்ற பணக்காரர்கள் காலப் போக்கில் வழக்கின் குழப்பங்களைக் கொண்டு வெளிவந்து சில பல கோடிகளை இழந்து விட்டு மற்ற வேலைகளைச் செய்யப் போய்விடுவார்கள்.

2. இப்படி ஒரு ஊழல் நடந்தது என்ற எண்ணம் கிஞ்சித்தும் இல்லாமல் எப்படி சர்காரியா கமிஷனின் அறிக்கையில் தான் விஞ்ஞானபூர்வமாக ஊழல் செய்வதில் டாக்டர் பட்டம் பெற்றவர் என்று தீர்ப்பு பெற்ற போதும் இதுவரை அதற்காகக் கைதாகாமல் இன்றுவரை தைரியமாக சக்ரநாற்காலியிலாவது உலாவர முடியுமென்றால் இது என்ன பெரிய விஷயம் என்று அந்தக் குடும்பம் இன்னும் வீறுகொண்டெழுந்து ஆடும்.

3. இந்த கேசை விசாரிக்கும் உச்ச நீதிமன்ற நீதிபதிக்கு ஏதாவது நடந்து அவருக்கு பதிலாக வேறு ஒருவர் “அடியைப் பிடிடா பாரதப் பட்டா” என்று இந்தக் கேசை முதலில் இருந்து ஆரம்பித்து நடத்த வேண்டும், அதுவரை இவர்கள் நீதி மன்றக் காவலில் இருக்காமல், வாரம் ஒருமுறை நீதி மன்றம் வந்து கையெழுத்திட்டால் போதும் என்று சொன்னால் போதும் இவர்கள் வீட்டிற்கு வந்து அடுத்த கட்ட நடவடிக்கையாக யாரை எப்படி ‘கவனிப்பது’ என்ற வேலையில் ஈடுபட ஆரம்பித்து விடுவார்கள்.

2ஜி அலைவரிசை ஒதுக்கீட்டில் நடந்திருப்பது மிகப் பெரிய ஊழல் என்பதில் சந்தேகம் இல்லை, ஆனால் எம்மைப் பொறுத்த வரையில், இது கண்டுபிடிக்கப் பட்டிருக்கிறது இன்னும் கண்டு பிடிக்கப் படாதது எவ்வளவோ என்ற மலைப்பு எமக்கு இன்னும் தீரவில்லை. இஸ்ரோவின் ஊழல் இதைவிட பல மடங்கு அதிகம் என்றும் அது பலமுறை நமது ‘சுத்தமான’ ப்ரதமருக்கு எடுத்துச் சொல்லப் பட்டும் அவர் அதை நடத்த அனுமதி தந்ததும் பிறகு விவகாரம் விஸ்வரூபம் எடுத்ததும் அந்த காண்ட்ராக்ட் நிறுத்தப் பட்டதும் சமீபத்தில் நடந்தது. அலைக்கற்றையில் ராஜா எனது பரிந்துரை எதையும் கேட்கவில்லை நான் நல்லவன் என்று ப்ரதமரே சொல்லிவிட்டார், சரி தகவல் தொடர்பு ப்ரதமரின் கீழ் இல்லாத இலாகா, ராஜாவின் கீழ் இருந்தது ஒப்புக் கொள்கிறோம், இஸ்ரோ ப்ரதமரின் கீழ் இன்றும் இயங்கும் இலாகாவாயிற்றே, அதில் எப்படி இப்படி ஒரு ஊழல், இவர் இவரே சொல்கிற படி நல்லவரென்றால், இவருக்குப் பின் இருந்து இப்படி பல ஊழல்களைச் செய்யும் அந்தக் கெட்டவர் யார்?

இதையெல்லாம், சி.பி.ஐயும் கேட்கப் போவதில்லை, உச்ச நீதி மன்றமும் கேட்கப் போவதில்லை, நம் நாட்டு மக்களும் கேட்கப் போவத்தில்லை.

“ஸாரே ஜஹான் ஸே அச்சா, இந்துஸ்தான் ஹமாரா”

மரியம் பிச்சை மரணம்.

தமிழகத்தின் சுற்றுச் சூழல் அமைச்சர் திரு. மரியம் பிச்சை சாலை விபத்தில் மரணமடைந்தார். இதில் ஏதோ மர்மமிருக்கிறது என்று ஜெயலலிதா வழக்கை சி.பி.சி.ஐ.டி குழுமத்திற்கு மாற்றியிருக்கிறார். இவர் போட்டியிட்டு தோற்கடித்த கே.என். நேரு திருச்சியில் அநேக இடங்களை கையகப்படுத்தியிருப்பவர், “என்னய்யா, திருச்சி மலைக் கோட்டையைத் தவிர எல்லா இடத்தையும் வாங்கிட்ட போல இருக்கே” என்று தாத்தாவால் பாராட்டப் பட்டவர், இதில் இவருடைய சம்பந்தம் இருக்கலாம் என்று தகவல்கள் கசிகிறது. இந்த விபத்தில் பல நெருடல்கள்:

1. இவருக்கு போலீஸ் பாதுகாப்பில்லை, காரணம் “இவர் வேண்டாம்ன்னு சொல்லிட்டார் அதனால நாங்க போயிட்டோம்” என்று போலீஸ் சால்ஜாப்பு சொல்கிறது. இது தாத்தாவின் கனவில் அண்ணா, பெரியார், காயிதே மில்லத் எல்லோரும் இவரைப் பாராட்டி பேசுவது போல இருக்கிறது.

2. இவருடைய ட்ரைவரிடம் ஒரு செல்ஃபோன் கூட இல்லை

3. இவர்களை இடித்த லாரி (லாரியா, டிப்பர் லாரியா, பெரிய கண்டெயினர் லாரியா என்றும் தெரியவில்லை), எங்கே என்றும் தெரியவில்லை

4. இவருடைய ட்ரைவருக்கு ஒரு கீறல் கூட இல்லாமல் தப்பி விட்டார் ஆனால், இவருக்கு அருகில் இருந்த அமைச்சர் நசுங்கி இறந்து விட்டார்.

எங்கேயோ யாருக்கோ கெட்ட காலம் ஜாம் ஜாம் என்று ஆரம்பித்து விட்டது என்பதற்கு இது அறிகுறி. இதற்கு நடுவில் தி.மு.க. இவருக்காக இரங்கல் கூட்டம் நடத்தி நடந்ததற்கு நாங்கள் பொறுபில்லை என்று காட்ட முயற்சித்திருக்கிறார்கள்.

ஐ.பி.எல் போட்டிகள்:

இந்தப் போட்டிகள் தேவையா, இல்லையா என்பது போய், இனி இந்த போட்டிகளை எப்படி முறைப் படுத்தலாம் என்று யோசிக்க ஆரம்பித்திருக்கிறார்கள். இதை முதலில் அறிமுகம் செய்த கபில் தேவ்வை கட்டம் கட்டி ஒதுக்கியது பி.சி.சி.ஐ என்று நினைவு, அந்த எம் கருத்து தவறானால் தெரியப் படுத்தவும். எமக்கு இந்தப் போட்டிகளின் அவசியம் புரியவில்லை, எனவே இதைப் பற்றி பேசாமலிருப்பதே உசிதம். இந்தப் போட்டிகளில் அரை குறை ஆடைகளில் “சீர் லீடர்” நடனங்கள் வேறு, சமயத்தில் இவர்கள் பரத நாட்டிய உடைகளிலும் வந்து நாட்டியம் ஆடுகிறார்கள் என்று கேள்வி, அது சரி என்றால், குஷ்பு இந்தியப் பெண்களைப் பற்றிப் பேசியதையும், அவர் காலில் செருப்புடன் ஒரு மேடையில் அமர்ந்திருந்ததையும் கேள்வி கேட்க யாருக்கும் அருகதையில்லை.

பித்தனின் கிறுக்கல்கள் தொடரும்.....

piththanp@gmail.com

பித்தனின் மற்றப் பதிவுகளை இங்கே படிக்கலாம்

பித்தனின் கிறுக்கல்கள் – 41

2011-05-23T06:29:00.005-06:00

சூரிய அஸ்தமனம்

சமீபத்தில் நமது வலைப்பூவில் வந்த ஒரு பதிவில் சூரிய அஸ்தமனம் என்று ஒரு படம் வெளியிட்டிருந்தார்கள். அது தமிழகத்தில் மிகச் சிறப்பாக நடந்தேறியிருக்கிறது. தி.மு.க கூட்டணியின் தோல்வி என்பது சமீபத்தில் ஜப்பானைத் தாக்கிய சுனாமியாக வந்து தாக்கி கதறக் கதற அடித்திருக்கிறது.

தோல்விக்கு பிறகு தி.மு.க விலிருந்து எதிர் அணிக்கு பறக்க இருக்கும் வல்லூறுகளை என்ன செய்வது என்று தெரியவில்லை, மகளை எப்படி காப்பாற்றப் போகிறோம் என்று, ஜால்ரா அடிக்கும் யாரும் கணிக்கக்கூட முடியவில்லை, தமிழகத்தில் நாதி இல்லாமல், மத்தியில் காங்கிரஸை முறைத்துக் கொள்ளவும் பயமாக இருக்கிறது, ஜெ எந்த கூட்டில் கை வைத்து எப்படி இவரது ஓட்டை விழுந்த ராஜாங்கத்தை முற்றும் சிதைக்கப் போகிறார் என்று கலக்கமாக இருக்கிறது. மனைவி, துணைவி, அது, இது என்று போகிற போக்கில சேர்த்துக் கொண்ட பலதும் சேர்ந்து இந்தத் தள்ளாத வயதில் தன்னை தாளிக்க ஆரம்பித்திருப்பதை தடுக்கவும் முடியவில்லை, வளர்த்து விட்ட மாறன் சகோதர பேரன்கள் அடுத்து என்ன செய்வார்கள் என்றும் தெரியவில்லை. தயாநிதியும் 2ஜியில் கைதாக வாய்ப்பிருப்பதாக செய்திகள் கசிகின்ற அதே நேரம், அவர் எப்போது எதை எவரிடம் சொல்லி யாருக்கு என்ன ஆபத்து வரப்போகிறதோ என்ற மனக் கவலையை சொல்லியழ மூளை இல்லாத உடன்பிறப்பு எதுவும் கண்ணுக்கெட்டிய தூரம் வரை காணவில்லை.

பாவம், தாத்தாவின் நிலைமை. இதற்குப் பிறகும் திருந்துவதாக இல்லாமல், த்ராபையான ஒரு கடிதத்தை இன்று ஒரு பெரிய கட்டுரையாக எழுதி வழக்கத்துக்கும் மிக அதிகமாக உளறியிருக்கிறார். உடன்பிறப்பிற்கு கடிதம் எழுதி அதை அவர்கள் நம்புவார்கள் என்று இவர் நம்புவது இவருடைய இஷ்டம். ஆனால், அவர்கள் நம்பினால் இவரும் இவருடைய கழிசடை கூட்டங்களும் செய்த கொள்ளையில் இருந்து இவர்களை நீதி மன்றம் விடுதலை செய்து வெளியில் விட்டுவிடும் என்று நினைத்து எழுதினாரோ, அல்லது இதை யாராவது மொழி பெயர்த்து காங்கிரஸ் தலைமைக்கு சொல்லி அவர்கள் ஏதாவது செய்வார்கள் என்று எழுதினாரோ தெரியவில்லை.

இவ்வளவு உளறியவருக்கு முதலில் 2 வருடங்களுக்கு முன்பு இவருடைய பேரன்களோடு நடந்த மோதல் முடிவுக்கு வந்து “கண்கள் பனித்தது, இதயம் இனித்தது” டைலாக் சொன்ன கையோடு 2G பற்றி ஒரு பத்திரிகைக்காரர் கேட்டதற்கு “அது முடிந்து போன விஷயம்” என்று தைரியமாக ஒரு உச்சநீதி மன்ற நீதிபதி போல தீர்ப்பு சொல்லி முழு பூசணிக்காயை பானைச் சோற்றில் இல்லை, ஒரு சோற்றுப் பருக்கையில் மறைக்க முயற்சித்ததை சாமர்த்தியமாக மறந்து விட்டார், மக்களும் சரி, கோர்ட்டும் சரி மறக்கவில்லை என்பது தெரியும் போது தடுமாறுகிறார்.

சமீபத்தில் ராஜா கைதான போது, ராஜா தலித் அதனால் ஆரியர்களும் பலரும் சேர்ந்து அவரை அழிக்க முயலுகிறார்கள் என்று சொன்ன டைலாக் மறந்து போன கையோடு, கனிமொழியைக் காப்பாற்ற “எல்லா தவறுகளையும் செய்தது ராசா தான்” என்று ராம்ஜெத்மலானியை வைத்து சொல்லச் செய்ததையும் மறந்து போய்விட்டார்.

ராஜா செய்த செயலால்தான் தமிழகத்தில் அனைவருக்கும் குறைந்த செலவில் செல் பேசியில் பேச வாய்ப்பு கிட்டியிருக்கிறது என்று இவரும் இவரது மகன் ஸ்டாலின் மற்றும் பலரும் உளறியிருந்தது மறந்து போய் “எல்லா தவறும் செய்தது ராசாதான்” என்று இப்போது சொல்ல முயலும் போது அன்று தான் சொன்னதுதான் தவறு என்று இன்றும் புரிந்து கொள்ளாமல், தான் சொல்வதையெல்லாம் கேட்க மூளையில்லாத உடன்பிறப்புகள் இருக்கிறது என்று எந்த தைரியத்தில் நம்பிக்கொண்டிருக்கிறார் என்று தெரியவில்லை.

இவர் சிறைச்சாலையில் மகளையும், மகளோடு சரத்குமார் மற்றும் ராசாவைச் சந்திக்க நாளை டெல்லி பயணமாகிறார். அவர்களை சிறையில் சந்திப்பதோடு நிறுத்திக் கொள்ளாமல் நீதி மன்றத்திலும் கொஞ்சிக் குலாவி அது நீதிபதிக்கு உறுத்தி “சரி சரி இவரையும் சக்கர நாற்காலியோடு உருட்டிக் கொண்டு போய் திஹார் ஜெயில் போடுங்கள், அங்கே கொஞ்சிக் குலாவட்டும்” என்று உத்தரவு பிறப்பித்தால் சூப்பராக இருக்கும்.

ரஜனி

ரஜனிக்கு உடல் நிலை சரியில்லை என்று நாளுக்கு ஒரு செய்தி வந்து கொண்டிருக்கிறது. எது எப்படியிருந்தாலும் அவர் சீக்கிரம் குணமடையவும், அதே நேரம் அவருடைய தீவிர ரசிகர்கள் கழக உடன் பிறப்புகள் போல பைத்தியக்காரத்தனமாக தற்கொலை என்ற முடிவிலிருந்து தள்ளி நிற்கவும் எல்லாம் வல்ல இறைவனை வேண்டுகிறோம்.

சிறந்த நடிகர் தனுஷ்

ஆடுகளம் என்றத் திரைப்படத்திற்கு தனுஷுக்கு இந்த விருது கிடைத்திருக்கிறது. இவருக்கு இது அதிகம், இது ரஜனிக்கு சென்றிருக்க வேண்டிய விருது என்றெல்லாம் பலர் கூச்சலிட ஆரம்பித்திருக்கும் வேளையில், நாம் மறந்து விட்ட ஒரு விஷயத்தை ஞாபகப் படுத்த விரும்புகிறேன். ரஜனியின் எந்திரன் படம் மிக மிக அதிக சிரத்தையோடு அவர் நடித்த ஒரு படம் அதில் அவருடைய நடிப்பு என்பது அந்த சிட்டி ரோபோ ஒரு வில்லனாக ஆனபிறகு அங்கங்கே பல இடங்களில் தெரிகிறது, ஆடுகளம் (இன்னமும் முழுவதும் பார்க்கவில்லை ஒரு 30 நிமிட படம் பார்க்கவேண்டியிருக்கிறது) அப்படி இல்லை, ஒரு பழைய லுங்கி, சட்டை, சண்டைச் சேவல், ஓட்டை சைக்கிள், கேவலமான தாடி, ஒரு சின்ன ஓட்டு வீடு என்று எந்த ஆரவாரமும் இல்லாமல் இருக்கும் ஒரு படம். இதில் படத்தை நகர்த்திக் கொண்டு செல்வது தனுஷ், கதை, திரைக்கதை, இயக்குனர், இசை மட்டுமே. மேலும் மறுபடி மறுபடி சிவாஜிக்கு தரப் படாத விருது என்பதால், அதை யாருக்கும் தரக்கூடாது என்ற வாதமும் ஏற்க்கக்கூடியதில்லை. அப்படிப் பார்த்தால், சுஹாசினி என்ற சராசரிக்கும் கீழான நடிப்பாற்றல் உள்ள நடிகைக்கு எப்படி கொடுத்தார்கள் என்று இன்றும் என்னால் வாதிடமுடியும்.

புத்தக விமர்சனம்

வின்ஸ் ஃப்ளின் எழுதிய அமெரிக்கன் அஸாஸின். இவர் எழுத்து அமெரிக்காவில் மிகப் ப்ரசித்தம் என்று சமீபத்தில் ஒருவர் எனக்கு அறிமுகம் செய்து வைக்க, இந்தப் புத்தகத்தை படிக்க ஆரம்பித்தேன்.

கதை சி.ஐ.ஏ.யின் சார்பில் தீவிரவாதத்தையும், தீவிர வாதிகளையும் அழிக்க இந்த கதையின் நாயகன் மிட்ச் ராப் போன்ற பலரை தயார் செய்வதையும், அவர்களின் பயிற்சி, அதற்காக அவர்கள் கொடுக்கும் விலை, அவர்களின் பயிற்ச்சியாளரின் திறமை போன்ற பலதை நமக்கு நம் கண் முன்னே கொண்டு வந்து காட்ட முயற்சிக்கிறார்

நல்ல நடை, நல்ல கதையமைப்பு எல்லாம் இருந்தும் ராஜேஷ் குமாரின் கதையைப் படிப்பது போல ஒரு உணர்வு எனக்கு தோன்றுவதை மாற்ற முடியவில்லை.

திரைப் பட விமர்சனம்.

மெக்கானிக்

லாஜிக் என்ற ஒன்றைப் பற்றிக் கவலைப் படாவிட்டால் இந்தப் படத்தை கண்டிப்பாக ரசிக்கலாம். குறிப்பாக இதன் கதாநாயகன் ஜேசன் ஸ்டதம் (ட்ரான்ஸ்போர்டர் புகழ்) வழக்கம் போல் அலட்டிக் கொள்ளாமல் நடிக்கிறார்.

விருவிருப்புக்கு குறைவில்லாத படம். இவருடன் ஹாஸ்டேஜ் என்ற ப்ரூஸ் வில்லீஸின் படத்தில் வில்லனாக வந்து கலக்கிய பென் ஃபாஸ்டர் மற்றும் டொனால்ட் சுத்தர்லாண்ட் நடித்திருக்கிறார்கள். குடும்பத்தோடு பார்க்கக் கூடிய படமில்லை.

லேயர் கேக்

ஜேம்ஸ்பாண்டாக நடிக்கும் டானியல் க்ரெய்க் நடிக்கும் ஒரு அருமையான படம். பலப் பல முடிச்சுகளை போட்டு அதையெல்லாம் கதாநாயகனான டானியல் முறியடிக்கிறாராரா இல்லையா என்று நம்மை சீட்டின் முனைக்கு நகர்த்தி தள்ளாட வைத்திருக்கும் ஒரு படம். கண்டிப்பாக ஒரு முறை பார்க்கலாம். கண்டிப்பாக குடும்பத்தோடு பார்க்கக் கூடிய படமில்லை.

பயணம்

ப்ரகாஷ்ராஜ் தயாரிப்பில், ராதா மோகனின் இயக்கத்தில் நாகார்ஜுன் நடித்து வெளிவந்துள்ள படம். கதை பி.ஜே.பி ஆட்சிக் காலத்தில் நடந்த காண்டஹார் விமானக் கடத்தலை மையமாகக் கொண்டு எடுக்கப் பட்டுள்ள அருமையான திரைப்படம். நகைச்சுவைக்கும் குறைவில்லாமல் மிக மிக நன்றாக எடுக்கப் பட்டுள்ள ஒரு படம். பல நல்ல புது நகைச்சுவை நடிகர்களை நமக்கு அறிமுகம் செய்து வைக்கும் அதே தருணத்தில் கதையின் போக்கு, விரு விருப்பு குறையாமல் வைத்திருக்கும் அந்தத் திறமை ராதாமோகனிடம் தெரிகிறது. குடும்பத்துடன் கண்டிப்பாக ஒரு முறை பார்க்கப் படவேண்டிய படம்.

யுத்தம் செய்

வழக்கம் போல அசட்டுச் சிரிப்புடன் வளைய வரும் சேரனைப் பார்த்து பார்த்து நொந்தவர்களுக்கு வித்தியாசமான ஒரு சேரனை நமக்கு அறிமுகம் செய்கிறார் மிஷ்கின். முதல் காட்சியில் ஆட்டோவில் தடுமாறி நிற்கும் ஒரு பெண்ணை பார்த்து அவளுக்கு உதவச் செல்லும் ஒரு பெண், அவளைத் தெறித்துப் பார்க்கும் ஆட்டோ ட்ரைவர் என்று ஆரம்பிக்கும் கதையில் தொய்வு என்று தேடினால்தான் கிடைக்கிறது. ஒய்.ஜி. மகேந்திரன் அவருடைய மனைவியாக வரும் லஷ்மி ராமகிருஷ்ணன், பிணவறையில் அடோப்ஸி செய்யும் டாக்டர் ஜுடாஸாக வரும் ஜெயப்ரகாஷ் என்று அனைவரும் கலக்குகிறார்கள். சில சில இடங்களில் திரைக்கதை (கதையும் கூட) தொய்கிறது, அதை விளக்கினால், கதையை முழுவதும் சொன்னது போல ஆகிவிடும். கண்டிப்பாக குழந்தைகளைத் தவிர்த்து விட்டு பார்ப்பது உத்தமம்.

3 இடியட்ஸ்

பல முறை பலரும் சொல்லியும் இந்தப் படத்தை இதுவரை பார்க்காமல், எனது நண்பன் சமீபத்தில் பார்த்து விட்டு ரொம்ப சிலாகித்து பேசி என்னைப் பார்க்கத் தூண்டியதனால் பார்த்தேன். இதை தமிழில் சங்கர் இயக்கி விஜய், ஜீவா மற்றும் ஸ்ரீகாந்த் மூவரும் நடித்துக்கொண்டிருக்கிறார்கள். அது எப்படி இருக்குமோ தெரியாது ஆனால், ஆமீர்கானையும், மாதவனையும், ஷர்மான் ஜோஷியையும் தாண்டி தமிழில் இம் மூவரும் நடிப்பில் மிஞ்சுவது ரொம்ப கஷ்டம். பொமன் இரானியின் நடிப்புக்கு இணை அவரேதான். படத்தில் தேவையில்லாத ஒரு பாத்திரம் என்றால் அது பொமன் இரானியின் இரண்டாவது மகள் பியாவாக வரும் கரீனா கபூர் தான். அதை கண்டிப்பாக மறந்து விட்டு பார்க்கலாம்.

கதை என்ன, காட்சி என்ன என்று கேட்காமல் இந்தப் படத்தை கண்டிப்பாக குடுபத்தோடு பல முறை பார்க்க்க் கூடிய ஒரு படம்.

பித்தனின் கிறுக்கல்கள் தொடரும்.....

piththanp@gmail.com

பித்தனின் மற்றப் பதிவுகளை இங்கே படிக்கலாம்

பித்தனின் கிறுக்கல்கள் – 40

2011-05-13T20:37:00.002-06:00

தமிழகத்தில் தேர்தல்
தமிழகத்தில் தேர்தல் முடிவுகள் வெளிவர இருக்கிறது என்று நேற்றே இந்தப் பதிவை வெளியிட முயற்சித்தேன், சோதனையாக (யாருக்கு?) blogger.com வேலை செய்யாமல் கழுத்தறுக்க, தேர்தல் முடிவு வெளிவந்த பிறகு வெளியிடுகிறேன். . இந்தப் பதிவு வெளிவரும் சமயம் முடிவுகள் வர ஆரம்பித்திருக்கும் அதற்கு முன்பாக பதிந்து விடவேண்டும் என்று எழுதியதால் பல கருத்துக்களை இதில் பதிவு செய்ய முடியவில்லை. அடுத்தப் பதிவில் அவற்றைப் பற்றி விலாவாரியாக கிறுக்கி விடுகிறேன்.

நான் அதிகம் எதிர்பார்த்த ஒரு தேர்தல் என்றால் தமிழகத்தின் இந்தத் தேர்தலைச் சொல்லலாம்.

ஒரு லட்சத்து எழுபதாயிரம் கோடி ஊழல் நடந்திருப்பதாக கணிக்கப் பட்டு தமிழக ஆளும் கட்சியைச் சார்ந்த மத்திய அமைச்சர் கைதுக்குப் பிறகு நடந்த தேர்தல்.

தி.மு.க தலைமையின் மகள், மனைவி இருவருக்கும் அந்த ஊழலில் தொடர்பு இருக்கலாம் என்று சந்தேகிக்கப்பட்ட நேரத்தில் நடந்த தேர்தல்.

இஸ்ரோ ஊழல், கார்கில் வீரர்களுக்கான குடியிருப்பில் ஊழல், விஜிலன்ஸ் கமிஷனரின் நியமனத்தில் ஊழல் என்று எங்கு திரும்பினாலும் ஊழலில் மட்டுமே திளைத்திருக்கும் மத்திய அரசு ஆளும் அதே நேரத்தில் நடக்கும் தேர்தல்.

அ.தி.மு.க வும் தே.மு.தி.க வும் கை கோர்த்து களம் காணும் முதல் தேர்தல்.
சுமாராக ஒரு தொகுதிக்கு 30-50 கோடி வரை இறைத்து சந்திக்கப் பட்ட தேர்தல்.

தி.மு.கவின் குடும்ப அரசியல் கூவம் நாற்றத்தையும் மீறி நாறிய பிறகு வந்த தேர்தல்.

தமிழகத்தை ஒரு கிழவனாரின் குடும்பம் கூறு போட்டு கட்டைப் பஞ்சாயத்து செலுத்துவதை கண் கூடாக கண்ட பிறகு வந்த தேர்தல்.

தேர்தல் கமிஷன் முன்பு இருந்ததை விட மிக மிக கண்டிப்பாக கண்காணித்த தேர்தல்.

மின்சாரம் எப்போதாவது வரும் ஒரு அபூர்வ சஞ்சீவனி என்ற நிலைக்கு தமிழகத்தை தி.மு.க. கட்சி கொண்டு சென்ற பிறகு வந்திருக்கும் தேர்தல்.

தமிழகம் என்பது கிழவனாரின் ஒரு திரைப்படத்தில் சொல்லப் பட்டது போல கொடியவர்களின் கூடாரமான பிறகு வந்திருக்கும் தேர்தல்.

அ.தி.மு.க ஆட்சிக்கு வந்தால் முதலில் மதுரையை அழகிரியிடமிருந்து மீட்பேன் என்று ஜெ. சூளுரைத்திருக்கும் தேர்தல்.

அவர் அவருடையை நகைகளை கோர்ட்டிலிருந்து முதலில் மீட்கட்டும் என்று கிழவனார் எள்ளி நகையாடிய தேர்தல்.

எத்தனை ஊழல்களை செய்தாலும் அதிலெல்லாம் தான் அறிவியல் பூர்வமாக தப்பிக்கும் வல்லமை படைத்தவன் என்பதை கிழவனார் மீண்டும் மீண்டும் நிரூபித்து லவ கிலேசமும் வெட்கப்படாமல் தலித் என்றும் பூணூல் என்றும் சொல்லி சொல்லியே மக்களை ஏமாற்றும் நிலையை பலரும் புரிந்து கொள்ள ஆரம்பித்த நேரத்தில் வந்த தேர்தல்.

ஜெயலலிதா ஊழல் இல்லாத பேர்வழியில்லை என்றாலும் அவருடைய சமீபத்திய ஆட்சி மிகச் சிறப்பாக இருந்தது என்பதை ஒப்புக் கொள்ளத்தான் வேண்டும். அரசு அலுவலர்களிடம் காட்டிய கண்டிப்பாக இருக்கட்டும், மழை நீர் சேகரிப்பாக இருக்கட்டும், வீராணம் திட்டம் என்று பல விஷயங்களில் ஒரு தெளிவான அணுகுமுறை அவரிடம் இருந்த்து. இதையெல்லாம் சொல்லியும், கிழவனாரின் கையாலாகத்தனத்தையும் சொல்லி அவர் சூறாவளிப் பயணம் செய்த தேர்தல்.

தன் மீது எந்தக் களங்கத்தையும் எவரும் (கைப்புள்ள வடிவேலு உட்பட பலர்) சொன்ன போதும் தனது கவனத்தை சிதறாது கிழவனாரையும் அவருடைய அடிப் பொடிகளையும் கேள்விகளாலேயே திணறடித்து மக்களை கவர்ந்த விஜயகாந்த் நம்பிக்கையோடு எதிர் பார்க்கும் தேர்தல்.

அருமையான பேச்சாளர் வைகோ வின் அனல் பறக்கும் பேச்சைக் கேட்க முடியாது போன தேர்தல்.

எமது கருத்து என்று சொன்னால், அதிமுக வெற்றி பெற்று ஆட்சி அமைக்க வேண்டும், அது இப்போது நடந்திருக்கிறது. சாதாரண வெற்றியென்று இல்லை, வரலாறு காணாத வெற்றி. 160ல் போட்டியிட்டு 147ல் அதிமுக வெற்றி பெற்றிருக்கிறது (91.87%), திமுக (21/119 - 17.67%), விஜயகாந்த் (27/45 65.85%), காங்கிரஸ் (5/63 - 7.93%).

அதனால் 16ம் தேதி முதல் தமிழகத்தில் பாலும் தேனும் ஓடப்போவதில்லை, கிழவனாரின் குடும்ப ஆதிக்கத்திலிருந்து தமிழகத்தை மீட்க ஒரு வழி கிடைக்கும். ஜெயல்லிதா போன ஆட்சியில் எப்படி தமிழகத்ததை கடனிலிருந்து மீட்டாரோ அதே செயலை மீண்டும் செய்ய வேண்டும். நமது பெரும் குடி மக்கள் அடுத்த முறை மீண்டும் கிழவனார் (அது வரை இருந்தால்) அல்லது அவரது அடிப்பொடிகளில் ஒருவர் என்று யாரையாவது கொண்டுவருவார்கள், மீண்டும் ஜெயலலிதா ‘தனது முயற்சியில் சற்றும் மனம் தளராத விக்ரமாதித்தன்.... “ போல மீண்டும் ஆட்சிக்கு வந்து ...... ‘அவள் ஒரு தொடர்கதை’ போல ஆட்சி செய்ய வேண்டும். ஹும். இது இந்த ஊர் ரிபப்ளிகன் (ஜெ), டெமாக்ரட் (கருணாநிதி) ஆட்சி போல என்று நீங்களாக கற்பனை செய்து கொண்டால் அதற்கு நான் பொறுப்பல்ல.

இப்போது தி.மு.க. எதிர் கட்சியாகக்கூட இல்லாமல் 3வது இடத்தை எட்டியிருக்கிறது. எதிர் கட்சியாக இருந்தாலே தாத்தா சட்ட சபைக்கு வரப் போவதில்லை, இதில் 3வது இடமென்றால், கேட்கவே வேண்டாம். பதவியில் இல்லாததால் இனி 5 வருடங்களுக்கு உளியின் ஓசை, இளைஞன், பொன்னர் சங்கர் என்று டப்பா படங்களுக்கு கதை வசனம் எழுத எந்த இளிச்சவாயன்களும் வரப்போவதில்லை. ரெகார்ட் டான்ஸ் பார்க்க முடியாது, பட்டமளிப்பு விழா கிடையாது, வாலி, வைரமுத்து, பா.விஜ்யின் ஜால்ரா சத்தம் இருக்காது, என்ன பண்ணப் போகிறாரோ என்றும் கவலைப்பட வேண்டியதில்லை, தாத்தாவால் தேர்தலில் மரண அடி வாங்கிய காங்கிரஸும் சும்மா இருக்காமல், 2ஜி வழக்கை சற்று முடுக்கி விட்டால் கனி, தயாளு என்று யாருக்காவது ஜாமீன், வாய்தா என்று கோர்ட் கோர்ட்டாக போய் வந்தால் 5 வருடம் பஞ்சாகப் பறந்து விடாதா?

இந்தப் பதிவை நேற்று ஒருவருக்கு வெள்ளோட்டமாக அனுப்பி பதிவை வெளியிடட்டுமா என்று கேட்டேன், அதற்கு அவர் “என்ன இலங்கை இனப் படுகொலையைப் பற்றி எதுவும் எழுதாமல் எப்படி இதை வெளியிடுவது” என்று என்னிடம் கேள்வி கேட்டார்”. அவரிடம், இலங்கையைப் பற்றி என்னிடம் கேட்காமல் இருப்பதே நல்லது என்று சொல்லி அவருடைய அந்த முயற்சிக்கு ஒரு முற்றுப் புள்ளி வைத்து விட்டேன்.

பித்தனின் கிறுக்கல்கள் தொடரும்.....
piththanp@gmail.com
பித்தனின் மற்றப் பதிவுகளை இங்கே படிக்கலாம்